رِسَالِةْ بُولُسْ لْرُومَة 6

المُوتْ وِالحَيَاةْ مْعَ المَسِيحْ

‏1 إِمَّالاَ آشْ بَاشْ نْقُولُوا؟ يَاخِي نُقْعْدُوا نْعِيشُوا فِي الخَطِيئَة بَاشْ النِّعْمَة تُكْثُرْ؟ ‏2 حَاشَا! أَحْنَا الِّي مُتْنَا عْلَى الخَطِيئَة كِيفَاشْ نَبْقَاوْ نْعِيشُوا فِيهَا؟ ‏3 وِلاَّ مَا كُمْشْ عَارْفِينْ الِّي أَحْنَا الكُلْنَا الِّي تْعَمِّدْنَا فِي المَسِيحْ يَسُوعْ تْعَمِّدْنَا بَاشْ نْمُوتُوا مْعَاهْ؟ ‏4 وْتِدْفِنَّا مْعَاهْ بِالمَعْمُودِيَّة فِي المُوتْ، بَاشْ كِيفْ مَا المَسِيحْ قَامْ مِنْ بِينْ المُوتَى بِالمَجْدْ مْتَاعْ الآبْ، هَكَّا أَحْنَا زَادَا بَاشْ نْعِيشُوا فِي الحَيَاةْ الجْدِيدَة. ‏5 رَاهُو كِيفْ مَا تْوَحِّدْنَا مْعَاهْ كِمُتْنَا كِيفُو، زَادَا بَاشْ نِتْوَحّْدُوا مْعَاهْ كِنْقُومُوا كِيفْ مَا قَامْ هُوَ. ‏6 وْإِحْنَا نَعْرْفُوا الِّي الإِنْسَانْ القْدِيمْ الِّي فِينَا تِصْلَبْ مْعَاهْ بَاشْ البْدَنْ مْتَاعْ الخَطِيئَة يِفْنَى، وْمَا عَادِشْ بَاشْ نَبْقَاوْ عَبِيدْ مْتَاعْ الخَطِيئَة. ‏7 رَاهُو الِّي يْمُوتْ يْوَلِّي حُرْ مِالسُّلْطَة مْتَاعْ الخَطِيئَة. ‏8 آمَا إِذَا كَانْ مُتْنَا مْعَ المَسِيحْ، رَانَا نِمّْنُوا الِّي أَحْنَا زَادَا بَاشْ نَحْيَاوْ مْعَاهْ. ‏9 وْنَعْرْفُوا إِنُّو المَسِيحْ بَعْدْ مَا قَيّْمُو اللهْ مِنْ بِينْ المُوتَى مُوشْ بَاشْ يْمُوتْ مَرَّة أُخْرَى وِالمُوتْ مُوشْ بَاشْ يْكُونْ عَنْدُو سُلْطَة عْلِيهْ، ‏10 وْكَوْنُو مَاتْ، هَاذَا مَعْنَاهْ إِنُّو مَاتْ مَرَّة وَحْدَة عْلَى الخَطِيئَة. وِالحَيَاةْ الِّي بَاشْ يْعِيشْهَا رَاهُو يْعِيشْهَا لِله، ‏11 إِمَّالاَ إِنْتُومَا زَادَا يِلْزِمْكُمْ تِحْسْبُوا رْوَاحْكُمْ مُوتَى عْلَى الخَطِيئَة وْحَيِّينْ للهْ فِي المَسِيحْ يَسُوعْ.

‏12 هَاذَاكَا عْلاَشْ مَا تْخَلِّيوْشْ الخَطِيئَة تْسَيْطِرْ عْلَى بْدُونَاتْكُمْ الفَانْيَة وِتْخَلِّيكُمْ اتَّبْعُوا الشْهَاوِي مْتَاعْهُمْ، ‏13 مَا تْسَلّْمُوشْ الأَعْضَاءْ مْتَاعْ بْدُونَاتْكُمْ لِلخَطِيئَة بَاشْ يِتْعْمَلْ بِيهُمْ الشَّرْ، آمَا سَلّْمُوا رْوَاحْكُمْ للهْ كِيفْ نَاسْ رَجْعُوا مِالمُوتْ لِلحَيَاةْ، وسَلْمُوا الأَعْضَاءْ مْتَاعْكُمْ للهْ بَاشْ يِتْعْمَلْ بِيهُمْ البِرْ، ‏14 رَاهِي الخَطِيئَة مَا عَادِشْ عِنْدْهَا حَتَّى سْيَادَة عْلِيكُمْ، مَا دَامْكُمْ مَا كُمْشْ تَحْتْ الشَّرِيعَة مْتَاعْ مُوسَى آمَا تَحْتْ النِّعْمَة.

عَبِيدْ مْتَاعْ البِرْ

‏15 شْنُوَّة مَالاَ؟ يَاخِي نَعْمْلُوا الخَطِيئَة عْلَى خَاطِرْنَا مَا نَاشْ تَحْتْ الشَّرِيعَة آمَا تَحْتْ النِّعْمَة؟ حَاشَا! ‏16 يَاخِي مَا تَعْرْفُوشْ الِّي إِذَا كَانْ تْسَلّْمُوا رْوَاحْكُمْ لأَيْ وَاحِدْ وِاطِّيعُوهْ كِيفْ العَبِيدْ، تْوَلِّيوْا العَبِيدْ مْتَاعُو؟ عَبِيدْ الخَطِيئَة الِّي تْهِزْ لِلمُوتْ وِلاَّ عَبِيدْ لِلطَّاعَة الِّي تْهِزْ لِلبِرْ. ‏17 آمَا نُشْكْرُوا اللهْ إِنّْكُمْ إِنْتُومَا الِّي كُنْتُوا عَبِيدْ مْتَاعْ الخَطِيئَة وَلِّيتُوا اطِّيعُوا بِقْلُوبْكُمْ الكُلْهَا فِي التَّعْلِيمْ الِّي خْذِيتُوهْ، ‏18 وِتْحَرِرْتُوا مِالخَطِيئَة وْوَلِّيتُوا عَبِيدْ مْتَاعْ البِرْ. ‏19 نِتْكَلِّمْ كِيفْ بَشَرْ يْرَاعِي الِّي انْتُومَا مَا تْنَجّْمُوشْ تِفْهْمُونِي. إِمَّالاَ كِيفْ مَا سَلِّمْتُوا الأَعْضَاءْ مْتَاعْكُمْ لِلنْجَاسَة وِالفْسَادْ بَاشْ تَعْمْلُوا الشَّرْ، إِمَّالاَ تَوَّا سَلْمُوا الأَعْضَاءْ مْتَاعْكُمْ كِيفْ عَبِيدْ لِلبِرْ بَاشْ تِتْقَدّْسُوا. ‏20 وْوَقْتِلِّي كُنْتُوا عَبِيدْ مْتَاعْ الخَطِيئَة، كُنْتُوا أَحْرَارْ مِالبِرْ. ‏21 إِمَّالاَ شْنُوَّة اسْتْفِدْتُوا مِالحَاجَاتْ الِّي تَوَّا وَلِّيتُوا تِحْشْمُوا بِيهُمْ؟ رَاهُمْ الحَاجَاتْ هَاذُمْ إخّْرِتْهُمْ المُوتْ. ‏22 آمَا تَوَّا، بَعْدْ مَا تْحَرِرْتُوا مِالخَطِيئَة وْوَلِّيتُوا العَبِيدْ مْتَاعْ اللهْ، الشَّيْء الِّي رْبِحْتُوهْ هُوَ القَدَاسَة الِّي تْهِزْ لِلحَيَاةْ الأَبَدِيَّة، ‏23 رَاهُو الأَجْرْ مْتَاعْ الذْنُوبْ هُوَ المُوتْ، آمَا العْطِيَّة مْتَاعْ اللهْ هِيَ الحَيَاةْ الأَبَدِيَّة فِي المَسِيحْ يَسُوعْ رَبّْنَا.