كْتَابْ أَعْمَالْ الرُّسُلْ 22

‏1 «يَا الإِخْوَة وْيَا الآبَاءْ اسْمْعُونِي، آنَا بَاشْ نْدَافِعْ عْلَى رُوحِي قُدَّامْكُمْ.» ‏2 وكِسَمْعُوهْ يْكَلِّمْ فِيهُمْ بِاللُّغَة العِبْرِيَّة زَادُو سِكْتُوا يَاخِي قَالْ: ‏3 «آنَا يْهُودِي تُولِدْتْ فِي طَرْسُوسْ المُوجُودَة فِي كِيلِيكِيَّة آمَا تْرَبِّيتْ فِي المْدِينَة هَاذِي وْكُنْتْ تِلْمِيذْ عِنْدْ غَمَالاَئِيلْ وِتْعَلِّمْتْ كِيفَاشْ نْطِيعْ الشَّرِيعَة مْتَاعْ جْدُودْنَا بِالضَّبْطْ وْكُنْتْ مِتْحَمِّسْ لْخِدْمِةْ اللهْ كِيفْكُمْ إِنْتُومَا بِالضَّبْطْ. ‏4 وْإِضْطَهِدْتْ النَّاسْ الِّي يْتَبّْعُوا فِي التَّعْلِيمْ هَاذَا لْحَدْ المُوتْ، وْكُنْتْ نْشِدْ فِيهُمْ رْجَالْ وِنْسَاء وْحَطِّيتْهُمْ فِي الحَبْسْ. ‏5 وْزَادَا أَعْلَى وَاحِدْ فِي رُؤَسَاءْ الكُهَّانْ وِالمَجْلِسْ مْتَاعْ الشْيُوخْ يِشْهْدُوا الِّي كْلاَمِي هَاذَا صْحِيحْ، وْآنَا خْذِيتْ مِنْ عِنْدْهُمْ جْوَابَاتْ وْهَزِّيتْهُمْ لِخْوَاتْهُمْ فِي دِمَشْقْ بَاشْ يْعَاوْنُونِي عْلَى شَدَّانْهُمْ بَاشْ انَّجِّمْ نْرَجَّعْهُمْ لْأُورْشَلِيمْ وِيِتْعَاقْبُوا.»

بُولُسْ يَحْكِي كِيفَاشْ قَابِلْ المَسِيحْ

(9‏:1‏-19؛ 26‏:12‏-18)

‏6 «وْوَقْتِلِّي قْرِيبْ نُوصِلْ لْدِمَشْقْ مْعَ نُصْفْ النْهَارْ ضْوَى عْلَيَّ نُورْ عْظِيمْ مِالسْمَاءْ. ‏7 يَاخِي طُحْتْ عْلَى الأَرْضْ وِسْمِعْتْ صُوتْ يْقُلِّي: "شَاوُلْ! شَاوُلْ! عْلاَشْ تِضْطَهِدْ فِيَّ؟" ‏8 جَاوِبْتْ: "شْكُونْ إِنْتِ يَا سِيدِي؟" قَالْ: "آنَا يَسُوعْ النَّاصْرِي الِّي إِنْتِ تِضْطَهِدْ فِيهْ." ‏9 وِالنَّاسْ الِّي مْعَايَ شَافُوا النُّورْ آمَا مَا سَمْعُوشْ الصُّوتْ الِّي يْكَلِّمْ فِيَّ. ‏10 يَاخِي سْأَلْتْ: "شْنُوَّة نَعْمِلْ يَا رَبْ؟" جَاوِبْنِي الرَّبْ وْقَالْ: "قُومْ وْأُدْخُلْ لْدِمَشْقْ، وْغَادِي يْقُولُولِكْ شْنُوَّة يِلْزْمِكْ تَعْمِلْ." ‏11 وْهَزُّونِي النَّاسْ الِّي مْعَايَ مِنْ يْدَيَّا حَتَّى لِينْ وَصّْلُونِي لْدِمَشْقْ عْلَى خَاطِرْنِي مَا عَادِشْ نْشُوفْ مِنْ كَثْرِةْ مَا النُّورْ مَاهُو قْوِي. ‏12 وْكَانْ ثَمَّة رَاجِلْ فِي دِمَشْقْ إِسْمُو حَنَانِيَّا يْخَافْ رَبِّي وْعَايِشْ كِيفْ مَا تْقُولْ الشَّرِيعَة، وِاليْهُودْ الِّي فِي دِمَشْقْ الكُلْهُمْ يِشْهْدُولُو الِّي هُوَ بَاهِي. ‏13 جَانِي وِوْقُفْ بْجَنْبِي وْقَالْ: "يَا خُويَا شَاوُلْ، شُوفْ." يَاخِي رْجَعْتْ نْشُوفْ بِالوَقْتْ، وْرِيتُو قُدَّامِي. ‏14 وْقَالْ: "إِلاَهْ جْدُودْنَا خْتَارِكْ مِنْ قْبَلْ بَاشْ تَعْرِفْ إِرَادْتُو وِتْشُوفْ الخَادِمْ البَارْ مْتَاعُو وْتِسْمَعْ صُوتْ خَارِجْ مِنْ فُمُّو. ‏15 إِنْتِ بَاشْ تْكُونْ شَاهِدْ لِيهْ قُدَّامْ النَّاسْ الكُلْ بِلِّي سْمَعْتْ وْرِيتْ. ‏16 وْتَوَّا فَاشْ تِسْتَنَّى قُومْ تْعَمِّدْ وْطَهِّرْ رُوحِكْ مِالذْنُوبْ وِادْعِي بْإِسْمْ الرَّبْ."»

‏17 «وْبَعْدْ مَا وْقَعْ الشَّيْء هَاذَا، رْجَعْتْ لْأُورْشَلِيمْ، وْكِكُنْتْ نْصَلِّي فِي الهَيْكِلْ شُفْتْ رُؤْيَا. ‏18 وْشُفْتْ الرَّبْ وْقَالِّي: "ازْرِبْ وْأُخْرُجْ تَوَّا مِنْ أُورْشَلِيمْ عْلَى خَاطِرْ نَاسْهَا مَا يِقْبْلُوشْ بَاشْ تِشْهِدْلِي فِيهَا." ‏19 يَاخِي قُلْتْ: "يَا رَبْ رَاهُمْ يَعْرْفُوا الِّي آنَا كُنْتْ نْلَوِّجْ عَلِّي يِمّْنُوا بِيكْ فِي المَجَامِعْ الكُلْهَا بَاشْ نَضْرِبْهُمْ وِنْحُطّْهُمْ فِي الحَبْسْ. ‏20 وْآنَا كُنْتْ مُوجُودْ وَقْتِلِّي قِتْلُوا شَهِيدِكْ اسْتِفَانُوسْ، آنَا كُنْتْ مْوَافِقْ عْلَى قَتْلاَنُو وْكُنْتْ نْعِسْ عْلَى حْوَايِجْ النَّاسْ الِّي قَتْلُوهْ" ‏21 آمَا هُوَ قَالِّي: "إِمْشِي بَاشْ نَبْعْثِكْ بْعِيدْ لِلنَّاسْ الِّي مَا هُمْشْ يْهُودْ."»

بُولُسْ يْدَافِعْ عْلَى رُوحُو

‏22 وْقَعْدُوا النَّاسْ يِسْمْعُوا فِيهْ حَتَّى لِينْ وْصُلْ للكِلْمَة هَاذِي، يَاخِي صَاحُوا وْقَالُوا لْقَايِدْ العَسْكِرْ: «إِمْحِي الرَّاجِلْ هَاذَا مِالأَرْضْ عْلَى خَاطْرُو مَا يِسْتْحَقِّشْ بَاشْ يْعِيشْ.» ‏23 مِنْ بَعْدْ بْدَاوْا يْصِيحُوا وْيَرْمِيوْ فِي حْوَايِجْهُمْ وِيْذَرُّوا فِي التْرَابْ فِي الهْوَاء. ‏24 يَاخِي أْمَرْ قَايِدْ العَسْكِرْ بَاشْ يْدَخّْلُوا بُولُسْ لِلقَازَرْنَة وْيِسْتَجْوْبُوهْ وْيَضْرْبُوهْ بِالسُّوطْ بَاشْ يَعْرِفْ شْنُوَّة الِّي خَلَّى النَّاسْ يْهِيجُوا عْلِيهْ. ‏25 وْوَقْتِلِّي العَسْكِرْ كَتّْفُوا بُولُسْ بَاشْ يَضْرْبُوهْ بِالسُّوطْ، قَالْ لْقَايِدْ العَسْكِرْ الِّي كَانْ وَاقِفْ بْجَنْبُو: «يَاخِي القَانُونْ يِسْمْحِلْكُمْ بَاشْ تَضْرْبُوا مُوَاطِنْ رُومَانِي بِالسُّوطْ قْبَلْ مَا تُحْكْمُوا عْلِيهْ؟» ‏26 وْكِسْمَعْ قَايِدْ العَسْكِرْ الكْلاَمْ هَاذَا مْشَى لِلقَايِدْ الكْبِيرْ مْتَاعُو وْخَبّْرُو بِالشَّيْء هَاذَا وْقَالْ: «شْنُوَّة بَاشْ تَعْمِلْ تَوَّا؟ رَاهُو الرَّاجِلْ هَاذَا رُومَانِي.» ‏27 يَاخِي مْشَى القَايِدْ الكْبِيرْ بِيدُو وْسِأْلُو: «بِالحَقْ إِنْتِ مُوَاطِنْ رُومَانِي؟» جَاوْبُو: «إِي نْعَمْ.» ‏28 قَالْ القَايِدْ: «آنَا دْفَعْتْ بَرْشَة فْلُوسْ بَاشْ وَلِّيتْ مُوَاطِنْ رُومَانِي.» يَاخِي قَالْ بُولُسْ: «آنَا رُومَانِي مِلِّي تُولِدْتْ.» ‏29 وْبِالوَقْتْ بَعِّدْ عْلِيهْ العَسْكِرْ الِّي كَانُوا يِسْتَجْوْبُوا فِيهْ وْيَضْرْبُوا فِيهْ وِالقَايِدْ الكْبِيرْ خَافْ بَرْشَة عْلَى خَاطْرُو عْرَفْ الِّي هُوَ كَتِّفْ مُوَاطِنْ رُومَانِي.

بُولُسْ فِي مَجْلِسْ اليْهُودْ

‏30 وْمِنْ غُدْوَة حَبْ القَايِدْ يَعْرِفْ حْقِيقِةْ التُّهْمَة الِّي تِهْمُوهْ بِيهَا اليْهُودْ، يَاخِي نَحَّالُو السْلاَسِلْ وِأْمَرْ بَاشْ يِسْتَدْعَاوْ رُؤَسَاءْ الكُهَّانْ ومَجْلِسْ الشْيُوخْ وِاسْتَدْعَى بُولُسْ زَادَا وْوَقّْفُو قُدَّامْهُمْ.