كْتَابْ أَعْمَالْ الرُّسُلْ 17

فِي تْسَالُونِيكِي

‏1 وْصُلْ بُولُسْ وْسِيلاَ لِمْدِينِةْ تْسَالُونِيكِي بَعْدْ مَا تْعَدَّاوْ عْلَى مْدِينِةْ أَمْفِيبُولِيسْ وِمْدِينِةْ أَبُولُونِيَّة. وْكَانْ ثَمَّة مَجْمَعْ مْتَاعْ يْهُودْ فِي مْدِينِةْ تْسَالُونِيكِي. ‏2 مْشَالْهُمْ بُولُسْ كِيفْ العَادَة وِقْعَدْ يْكَلِّمْ فِيهُمْ مِالكْتَابْ المُقَدَّسْ لْمُدِّةْ ثْلاَثَة سْبَاتْ. ‏3 وْفَسّْرِلْهُمْ وْوَرَّاهُمْ الِّي المَسِيحْ كَانْ لاَزْمُو يِتْعَذِّبْ وِيْقُومْ مِنْ بِينْ المُوتَي، وْقَالِلْهُمْ: «المَسِيحْ الِّي تِسْتَنَّاوْ فِيهْ هُوَ يَسُوعْ الِّي آنَا تَوْ قَاعِدْ نْبَشِّرْ فِيكُمْ بِيهْ.» ‏4 يَاخِي ثَمَّة شْكُونْ مِالحَاضْرِينْ اقْتَنْعُوا وْوَلاَّوْ مْعَ بُولُسْ وْسِيلاَ، وْكَانُوا مَا بِينَاتْهُمْ بَرْشَة يُونَانِيِّينْ يِعْبْدُوا فِي رَبِّي وْبَرْشَة نْسَاء رْجَالْهُمْ مَعْرُوْفِينْ فِي المْدِينَة. ‏5 آمَا اليْهُودْ الِّي مَا امّْنُوشْ ثَارُوا عْلَى خَاطِرْهُمْ غَارُوا مِنْهُمْ وْلَمُّوا نَاسْ مِتْشَرّْدِينْ وْأَشْرَارْ وْعَمْلُوا مَشَاكِلْ فِي البْلاَدْ وْمِنْ بَعْدْ هِجْمُوا عْلَى دَارْ يَاسُونْ، وْطَلْبُوا مِنُّو بَاشْ يْخَرّْجِلْهُمْ بُولُسْ وْسِيلاَ بَاشْ يْسَلْمُوهُمْ لِلمَحْكْمَة. ‏6 وْكِمَا لْقَاوْهُمْشْ جَابُوا يَاسُونْ وِجْمَاعَة مِالإِخْوَة وْهَزُّوهُمْ لْحُكَّامْ المْدِينَة، وِشْكَاوْ بِيهُمْ وْهُومَا يْصِيحُوا: «النَّاسْ هَاذُمْ قِلْبُوا الدِّنْيَا، وْتَوْ جَاوْ لِلمْدِينَة مْتَاعْنَا. ‏7 يَاسُونْ ضَيِّفْهُمْ فِي دَارُو وْهُومَا الكُلْهُمْ يْخَالْفُوا فِي الأَوَامِرْ مْتَاعْ القَيْصَرْ وِيْقُولُوا الِّي ثَمَّة مَلِكْ آخَرْ إِسْمُو يَسُوعْ.» ‏8 وِالكْلاَمْ هَاذَا قَلِّقْ النَّاسْ وِالحُكَّامْ. ‏9 وْمَا سَيّْبُوا يَاسُونْ وِبْقِيِّةْ الإِخْوَة كَانْ بَعْدْ مَا خْذَاوْ كَفَالَة مِنْ عِنْدْ يَاسُونْ

فِي بِيرِيَّة

‏10 وْفِي اللِّيلْ بَعْثُوا الإِخْوَة بُولُسْ وْسِيلاَ لِمْدِينِةْ بِيرِيَّة، وَقْتِلِّي وُصْلُوا مْشَاوْ لِلمَجْمَعْ مْتَاعْ اليْهُودْ الِّي فِيهَا. ‏11 وِاليْهُودْ مْتَاعْ بِيرِيَّة كَانُوا خِيرْ مِاليْهُودْ الِّي فِي تْسَالُونِيكِي وْقِبْلُوا كِلْمِةْ الرَّبْ وْحَبُّوهَا بَرْشَة وِبْدَاوْا يَقْرَاوْ فِي الكْتَابْ كُلْ يُومْ بَاشْ يِتْأَكّْدُوا الِّي التَّعْلِيمْ الِّي يِسْمْعُوا فِيهْ صْحِيحْ وِلاَّ لاَ. ‏12 وْبَرْشَة مِنْهُمْ إِمّْنُوا وْزَادَا ثَمَّة نْسَاء يُونَانِيَّاتْ مَعْرُوفِينْ إِمّْنُوا وْبَرْشَة رْجَالْ يُونَانِيِّينْ زَادَا. ‏13 وْعَرْفُوا اليْهُودْ الِّي فِي تْسَالُونِيكِي الِّي بُولُسْ يْبَشِّرْ بْكِلْمِةْ اللهْ فِي مْدِينِةْ بِيرِيَّة. خَلْطُوا عْلِيهْ وِبْدَاوْا يْهَيّْجُوا عْلِيهْ فِي النَّاسْ. ‏14 وْفِي الوَقْتْ هَاذَاكَا ثَمَّة جْمَاعَة مِالمُؤْمْنِينْ هَزُّوا بُولُسْ لِلبْحَرْ بَاشْ يْسَافِرْ، وِقْعَدْ سِيلاَ وْتِيمُوثَاوُسْ الغَادِي. ‏15 وِمْشَاوْ المُؤْمْنِينْ مْعَ بُولُسْ وْوَصّْلُوهْ لْأَثِينَا. وْمِنْ بَعْدْ رَجْعُوا بَعْدْ مَا وَصَّاهُمْ بُولُسْ بَاشْ يَبْعْثُولُو سِيلاَ وْتِيمُوثَاوُسْ فِي أَقْرِبْ وَقْتْ مُمْكِنْ.

فِي أَثِينَا

‏16 وَقْتِلِّي بُولُسْ كَانْ يِسْتَنَّى فِيهُمْ فِي أَثِينَا، شَافْ المْدِينَة مِلْيَانَة بِالصْنَبْ. يَاخِي حَسْ الِّي رُوحُو حْزِينَة. ‏17 وِبْدَا يْكَلِّمْ فِي اليْهُودْ، وِالنَّاسْ الِّي دِيمَا يُقْعْدُوا فِي المَجْمَعْ بَاشْ يِعْبْدُوا رَبِّي وِالنَّاسْ الِّي يَلْقَاهُمْ كُلْ يُومْ فِي السُّوقْ. ‏18 وِتْنَاقِشْ مْعَ الفَلاَسْفَة الأَبِيقُورِيِّينْ وِالرِّوَاقِيِّينْ، وَقْتِلِّي لْقَاوْهْ يْبَشِّرْ بْيَسُوعْ وِالقْيَامَة مِالمُوتْ قَالُوا: «آشْ يُقْصُدْ بِكْلاَمُو الرَّاجِلْ هَاذَا الِّي يْخَرِّفْ؟» وْنَاسْ أُخْرِينْ قَالُوا: «ظَاهِرْ الِّي هُوَ يِدْعِي فِي النَّاسْ بَاشْ يِعْبْدُوا آلْهَة أُخْرَى.» ‏19 مِنْ بَعْدْ هَزُّوهْ لْمَجْلِسْ المْدِينَة الِّي يِتْسَمَّى الأَرْيُوبَاغُوسْ وْسِأْلُوهْ: «انَّجّْمُوشْ نَعْرْفُوا التَّعْلِيمْ الجْدِيدْ الِّي تْنَادِي بِيهْ؟ ‏20 أَحْنَا قَاعْدِينْ نِسْمْعُوا فِي كْلاَمْ غْرِيبْ وِنْحِبُّوا نَعْرْفُوا آشْ مَعْنَاهْ.» ‏21 (وْكَانُوا أَهْلْ أَثِينَا وِالبْرَايْنِيَّة الِّي السَّاكْنِينْ فِيهَا يْعَدِّيوْ أَوْقَاتْ فَرَاغْهُمْ يِتْنَاقْشُوا فِي الأَفْكَارْ الجْدِيدَة.)

‏22 وْقُفْ بُولُسْ فِي وُسْطْ المَجْلِسْ وْقَالْ: «يَا أَهْلْ أَثِينَا، آنَا قَاعِدْ نْشُوفْ الِّي إِنْتُومَا الكُلْكُمْ مِدَّيْنِينْ بَرْشَة. ‏23 وَقْتِلِّي كُنْتْ نْدُورْ فِي مْدِينِتْكُمْ وْنُخْزُرْ لِلمَعَابِدْ مْتَاعْكُمْ لْقِيتْ مَذْبَحْ مَكْتُوبْ عْلِيهْ: لْإِلاَهْ مَجْهُولْ. آنَا رَانِي قَاعِدْ نْبَشِّرْ فِيكُمْ بِالإِلاَهْ المَجْهُولْ هَاذَا الِّي إِنْتُومَا تِعْبْدُوا فِيهْ وْمَا تَعْرْفُوهِشْ. ‏24 اللهْ الِّي خْلَقْ العَالَمْ وْكُلْ مَا فِيهْ، الِّي مَا يُسْكُنْشْ فِي مَعَابِدْ بْنَاتْهَا يْدِينْ البَشَرْ عْلَى خَاطْرُو هُوَ الِّي يِمْلِكْ السْمَاءْ وِالأَرْضْ. ‏25 وْمَا يِحْتَاجِشْ لِيْدِينْ النَّاسْ بَاشْ تِخْدْمُو، عْلَى خَاطْرُو هُوَ بِيدُو يَعْطِي لِلنَّاسْ الكُلْ الحَيَاةْ وِالنْفَسْ وْكُلْ شَيْء. ‏26 وِخْلَقْ النَّاسْ الكُلْهُمْ مِنْ إِنْسَانْ وَاحِدْ وْسَكِّنْهُمْ فِي الأَرْضْ الكُلْهَا وْحَطِّلْهُمْ الوَقْتْ الِّي بَاشْ يْعِيشُوا فِيهْ وِالحْدُودْ مْتَاعْ البْلاَدْ الِّي بَاشْ يُسْكْنُوا فِيهَا. ‏27 بَاشْ يْلَوّْجُوا عْلَى رَبِّي، بَالِكْشِي يَلْقَاوْهْ وْيِقْبْلُوهْ، وْهُوَ، مُوشْ بْعِيدْ عْلَى كُلْ وَاحِدْ فِينَا. ‏28 رَانَا نَحْيَاوْ وْنِتْحَرّْكُوا وْنِتْوِجْدُوا بِيهْ هُوَ. وْكِيمَا قَالْ وَاحِدْ مِنْ الشُّعَرَاءْ مْتَاعْكُمْ: "أَحْنَا زَادَا ذُرِّيتُو." ‏29 وْمَا دَامْنَا أَحْنَا ذُرِّيِّةْ اللهْ إِمَّالاَ مَا يِلْزِمْنَاشْ نْفَكّْرُوا الِّي اللهْ كِيفْ صَنْبَة مِالذّْهَبْ وِلاَّ مِالفِضَّة وِلاَّ حَجْرَة يُنْقُشْهَا الإِنْسَانْ كِيفْ مَا يْحِبْ. ‏30 اللهْ قْبَلْ نْسَى أَيَّامَاتْ الجَهْلْ الِّي فَاتِتْ وْتَوْ يُأْمُرْ فِي النَّاسْ الكُلْ الِّي فِي الدِّنْيَا بَاشْ يْتُوبُوا. ‏31 وِعْلَى خَاطْرُو حَطْ نْهَارْ بَاشْ يْحَاسِبْ فِيهْ العَالَمْ بِالعَدْلْ عْلَى طْرِيقْ رَاجِلْ خْتَارُو لِلشَّيْء هَاذَا وِعْطَى لِلنَّاسْ الكُلْ الدَّلِيلْ الِّي هُوَ بَاشْ يَعْمِلْ الشَّيْء هَاذَا وَقْتِلِّي قَوّْمُو مِنْ بِينْ المُوتَى.»

‏32 وَقْتِلِّي سَمْعُوهْ يَحْكِي عْلَى قْيَامِةْ المُوتَى ثَمَّة شْكُونْ مِنْهُمْ بْدَاوْا يَضْحْكُوا. آمَا نَاسْ أُخْرِينْ قَالُوا لْبُولُسْ: «مَاذَا بِينَا تْزِيدْ تِحْكِيلْنَا عْلَى الأُمُورْ هَاذِي مَرَّة أُخْرَى.» ‏33 وْهَكَّا خْرَجْ بُولُسْ مِنْ بِحْذَاهُمْ. ‏34 آمَا ثَمَّة جْمَاعَة مِنْهُمْ وَلاَّوْ مْعَ بُولُسْ وِامّْنُوا، وْمِنْهُمْ دْيُونِيسْيُوسْ الِّي كَانْ عُضْوْ فِي المَجْلِسْ مْتَاعْهُمْ وِمْرَا اسْمْهَا دَامَارِيسْ، وْنَاسْ أُخْرِينْ.