إِنْجِيلْ يُوحَنَّا 21

يَسُوعْ يُظْهُرْ لْسَبْعَة مِنْ تْلاَمِذْتُو

‏1 وْزَادْ يَسُوعْ ظَهِّرْ رُوحُو مَرَّة أُخْرَى لِتْلاَمِذْتُو بِحْذَا البُحَيْرَة مْتَاعْ طَبَرِيَّة وِظْهَرِّلْهُمْ هَكَّا. ‏2 سِمْعَانْ بُطْرُسْ، وْتُومَا الِّي يْعَيّْطُولُو التُّومِي، وْنَثَنَائِيلْ الِّي مِالمَنْطْقَة مْتَاعْ قَانَا الجَلِيلْ، وِوْلاَدْ زَبَدِي، وْزُوزْ تْلاَمْذَةْ أُخْرِينْ مِنْ تْلاَمِذْةْ يَسُوعْ الكُلْهُمْ تْلَمُّوا. ‏3 قَالِلْهُمْ سِمْعَانْ بُطْرُسْ: «آنَا مَاشِي بَاشْ نِصْطَادْ.» قَالُولُو: «أَحْنَا زَادَا نِمْشِيوْا مْعَاكْ.» خَرْجُوا وْطَلْعُوا فِي الفْلُوكَة، آمَا اللِّيلَة هَاذِيكَا مَا صْطَادُوا حَتَّى شَيْء.

‏4 وَقْتِلِّي طْلَعْ النْهَارْ جَا يَسُوعْ لِلشَّطْ، آمَا التْلاَمْذَة مَا عَرْفُوهِشْ. ‏5 قَالِلْهُمْ: «يَا وْلاَدِي، يَاخِي مَا صْطَدْتُوشْ حُوتْ» جَاوْبُوهْ: «لاَ.» ‏6 قَالِلْهُمْ: «ارْمِيوْ الشْبَاكْ عْلَى يْمِينْ الفْلُوكَة وْتَوْ تَلْقَاوْ الحُوتْ.» رْمَاوْ الشْبَاكْ وْمَا نَجّْمُوشْ يْخَرّْجُوهَا مِنْ كَثْرِةْ مَاهِي مْعُبّْيَة بِالحُوتْ. ‏7 قَالْ التِّلْمِيذْ الِّي يَسُوعْ يْحِبُّو لْبُطْرُسْ: «هَاذَا هُوَ الرَّبْ!» كِسْمَعْ سِمْعَانْ بُطْرُسْ كِلْمِةْ: «هَاذَا هُوَ الرَّبْ»، لْبِسْ دَبْشُو عْلَى خَاطْرُو كَانْ عِرْيَانْ، وِرْمَى رُوحُو فِي المَاء. ‏8 وْجَاوْ التْلاَمْذَة الأُخْرِينْ فِي الفْلُوكَة، يْكَرْكْرُوا فِي الشْبَاكْ الِّي مْعُبّْيَة بِالحُوتْ، وْكَانُوا بْعَادْ عْلَى الشَّطْ مِيتِينْ مِيتْرُو. ‏9 وْوَقْتِلِّي خَرْجُوا لِلشَّطْ شَافُو خُبْزْ وْحُوتْ قَاعِدْ يْطِيبْ عْلَى النَّارْ. ‏10 قَالِلْهُمْ يَسُوعْ: «جِيبُوا مِالحُوتْ الِّي شَدِّيتُوهْ تَوْ.» ‏11 طْلَعْ سِمْعَانْ بُطْرُسْ فُوقْ الفْلُوكَة وِجْبِدْ الشْبَاكْ المَلْيَانْ بِالحُوتْ الكْبِيرْ لِلشَّطْ وْكَانِتْ فِيهَا مْيَة وِثْلاَثَة وْخَمْسِينْ حُوتَة، وْرَغْمِلِّي الحُوتْ كَانْ بَرْشَة الشْبَاكْ مَا تْقَطِّعْشْ. ‏12 قَالِلْهُمْ يَسُوعْ: «إِيجَاوْ كُولُوا!» وْحَتَّى وَاحِدْ مِالتْلاَمْذَة مَا تْجَرِّأْ بَاشْ يِسْأْلُو شْكُونْ إِنْتِ، وْهُومَا عَرْفُوا الِّي هُوَ الرَّبْ. ‏13 وْقَدِّمْ يَسُوعْ، وِخْذَا الخُبْزْ وِعْطَاهُمْ، وْزَادْ مَدِّلْهُمْ الحُوتْ. ‏14 هَاذِي كَانِتْ المَرَّة الثَّالْثَة الِّي ظْهُرْ فِيهَا يَسُوعْ لِتْلاَمِذْتُو بَعْدْ مَا قَامْ مِنْ بِينْ المُوتَى.

يَسُوعْ وْبُطْرُسْ

‏15 وْبَعْدْ مَا كْلاَوْ، قَالْ يَسُوعْ لْسِمْعَانْ بُطْرُسْ: «يَا سِمْعَانْ وِلْدْ يُوحَنَّا، يَاخِي تْحِبّْنِي أَكْثِرْ مِلِّي يْحِبُّونِي هَاذُومَا الكُلْهُمْ؟» جَاوْبُو: «إِي نْعَمْ، يَا رَبْ. إِنْتِ تَعْرِفْ الِّي آنَا نْحِبِّكْ.» قَالُّو: «أَرْعَى الغْنَمْ مْتَاعِي.»

‏16 وْقَالُّو يَسُوعْ مَرَّة أُخْرَى: «يَا سِمْعَانْ وِلْدْ يُوحَنَّا، يَاخِي تْحِبّْنِي؟» جَاوْبُو: «إِي نْعَمْ، يَا رَبْ، إِنْتِ تَعْرِفْ الِّي آنَا نْحِبِّكْ.» قَالُّو: «أَرْعَى الغْنَمْ مْتَاعِي.»

‏17 وْسِأْلُو مَرَّة ثَالْثَة: «يَا سِمْعَانْ يَا وِلْدْ يُوحَنَّا، يَاخِي تْحِبّْنِي؟» يَاخِي حْزِنْ بُطْرُسْ عْلَى خَاطِرْ يَسُوعْ سِأْلُو ثْلاَثَة مَرَّاتْ: يَاخِي تْحِبّْنِي؟ قَالُّو: «يَا رَبْ، إِنْتِ تَعْرِفْ كُلْ شَيْء، وْتَعْرِفْ الِّي آنَا نْحِبِّكْ.» قَالُّو يَسُوعْ: «أَرْعَى الغْنَمْ مْتَاعِي. ‏18 نْقُلِّكْ الحَقْ الحَقْ وَقْتِلِّي، كُنْتْ صْغِيرْ، كُنْتْ تِتْحَزِّمْ وْتِمْشِي وِينْ تْحِبْ. وْوَقْتِلِّي تْوَلِّي شَايِبْ تْمِدْ يْدِيكْ، وْوَاحِدْ آخَرْ يْحَزّْمِكْ وِيْهِزِّكْ لِلبْلاَصَة الِّي مَا تْحِبِّشْ تِمْشِيلْهَا.» ‏19 (بِالكْلاَمْ هَاذَا يَسُوعْ لَمِّحْ لْكِيفَاشْ بُطْرُسْ بَاشْ يْمُوتْ، وِالمِيتَة مْتَاعُو بَاشْ يْمَجِّدْ بِيهَا اللهْ.) وِمْبَاعِدْ قَالُّو: «تَبَّعْنِي!»

التِّلْمِيذْ الِّي يَسُوعْ كَانْ يْحِبُّو

‏20 وِتْلَفِّتْ بُطْرُسْ وْرَاهْ، يَاخِي شَافْ التِّلْمِيذْ الِّي يَسُوعْ يْحِبُّو يِمْشِي وْرَاهُمْ، وْهُوَ الِّي اتَّكَّى عْلَى سْدِرْ يَسُوعْ وَقْتْ العْشَاء وْقَالُّو: «يَا رَبْ، شْكُونُو الِّي بَاشْ يْخُونِكْ؟» ‏21 وَقْتِلِّي شَافُو قَالْ بُطْرُسْ لْيَسُوعْ: «يَا رَبْ، وْهَاذَا آشْ بَاشْ يْصِيرْلُو؟» ‏22 قَالُّو يَسُوعْ: «إِذَا كَانْ آنَا نْحِبْ نْخَلِّيهْ حَيْ لِلِّي نَرْجَعْ، إِنْتِ آشْ دَخّْلِكْ؟ تَبَّعْنِي إِنْتِ!» ‏23 بِسْبَبْ الكْلاَمْ هَاذَا طَلْعِتْ اشَاعَة بِينْ التْلاَمْذَة الِّي التِّلْمِيذْ هَاذَاكَا مُوشْ بَاشْ يْمُوتْ، رَغْمِلِّي يَسُوعْ مَا قَالِشْ لْبُطْرُسْ الِّي هُوَ مُوشْ بَاشْ يْمُوتْ، آمَا قَالُّو: «إِذَا كَانْ آنَا نْحِبْ نْخَلِّيهْ حَيْ لِلِّي نَرْجَعْ، إِنْتِ آشْ دَخّْلِكْ؟»

الخَاتْمَة

‏24 وِالتِّلْمِيذْ هَاذَا هُوَ الِّي يِشْهِدْ بِالحَاجَاتْ هَاذِي الكُلْ، وِكْتِبْهَا لِهْنَا. وْإِحْنَا نَعْرْفُوا الِّي شْهَادْتُو صْحِيحَة.

‏25 وْثَمَّة بَرْشَة حَاجَاتْ أُخْرِينْ عْمَلْهُمْ يَسُوعْ، نِتْصَوِّرْ كَانْ تِتْكْتِبْ بِالوَحْدَة بِالوَحْدَة، العَالَمْ الكُلُّو مَا يِكْفِيشْ بَاشْ يَرْفِعْ الكْتُبْ الِّي بَاشْ تِتْكْتِبْ فِيهَا.