إِنْجِيلْ يُوحَنَّا 17

يَسُوعْ يْصَلِّي مِنْ أَجْلْ تْلاَمِذْتُو

‏1 بَعْدْ مَا قَالْ الكْلاَمْ هَاذَا الكُلُّو، هَزْ يَسُوعْ عِينِيهْ لِلسْمَاء وْقَالْ: «يَا بَابَا الوَقْتْ جَا: مَجِّدْ ابْنِكْ بَاشْ ابْنِكْ يْمَجّْدِكْ ‏2 وْبِالسُّلْطَة الِّي عْطِيتْهَالُو عْلَى البَشَرْ الكُلْ بَاشْ يَعْطِي الحَيَاةْ الأَبَدِيَّة لِلنَّاسْ الكُلْ الِّي عْطِيتْهُمْلُو. ‏3 وِالحَيَاةْ الأَبَدِيَّة هِيَ إِنّْهُمْ يَعْرْفُوكْ إِنْتِ وَحْدِكْ الإِلاَهْ الحَقْ وْيَسُوعْ المَسِيحْ الِّي بْعَثْتُو. ‏4 آنَا مَجِّدْتِكْ فِي الأَرْضْ كِكَمِّلْتْ الخِدْمَة الِّي عْطِيتْهَالِي بَاشْ نَعْمِلْهَا ‏5 وْتَوْ يَا بَابَا مَجِّدْنِي بِالمَجْدْ الِّي كَانْ عِنْدِي وَقْتِلِّي كُنْتْ مْعَاكْ قْبَلْ مَا يِتْخْلَقْ العَالَمْ.

‏6 آنَا ظَهِّرْتْ إِسْمِكْ لِلِّي عْطِيتْهُمْلِي مِالعَالَمْ. هُومَا كَانُوا مْتَاعِكْ، وْإِنْتِ عْطِيتْهُمْلِي وْطَاعُوا كْلاَمِكْ. ‏7 وْتَوْ يَعْرْفُوا الِّي كُلْ شَيْء عْطِيتْهُولِي هُوَ مِنْ عِنْدِكْ إِنْتِ. ‏8 رَانِي عْطِيتْهُمْ الكْلاَمْ الِّي إِنْتِ عْطِيتْهُولِي مِنْ عِنْدِكْ، وْهُومَا قِبْلُوهْ وْعَرْفُوا بِالحَقْ الِّي آنَا جِيتْ مِنْ عِنْدِكْ وِامّْنُوا انِّكْ إِنْتِ الِّي بْعَثْتْنِي. ‏9 آنَا نْصَلِّي مِنْ أَجْلْهُمْ، وْمَا نْصَلِّيشْ مِنْ أَجْلْ العَالَمْ، آمَا مِنْ أَجْلْ الِّي عْطِيتْهُمْلِي عْلَى خَاطِرْهُمْ مْتَاعِكْ. ‏10 كُلْ مَا هُوَ لِيَّا رَاهُو لِيكْ، وِلِّي لِيكْ رَاهُو لِيَّا، وْآنَا تْمَجِّدْتْ فِيهُمْ. ‏11 مَا نِيشْ بَاشْ نَبْقَى فِي العَالَمْ آمَا هُومَا رَاهُمْ بَاشْ يَبْقَاوْ فِي العَالَمْ، وْآنَا جَايِكْ. يَا الآبْ القُدُّوسْ، النَّاسْ الِّي عْطِيتْهُمْلِي احْفِظْهُمْ فِي إِسْمِكْ، بَاشْ يْكُونُوا وَاحِدْ كِيفْ مَا آنَا وْإِنْتِ وَاحِدْ. ‏12 وَقْتِلِّي كُنْتْ مْعَاهُمْ حْفَظْتْهُمْ فِيكْ. الِّي عْطِيتْهُمْلِي حْفَظْتْهُمْ، وْمَا هْلِكْ مِنْهُمْ حَتَّى وَاحِدْ كَانْ وِلْدْ الهْلاَكْ بَاشْ يْتِمْ الِّي تْقَالْ فِي الكْتَابْ المُقَدَّسْ. ‏13 وْآنَا تَوْ جَايِكْ. نْقُولْ الشَّيْء هَاذَا وْآنَا مَازِلْتْ فِي العَالَمْ بَاشْ فَرْحْتِي تْوَلِّي عِنْدْهُمْ وِتْكُونْ كَامْلَة. ‏14 آنَا عْطِيتْهُمْ كِلْمْتِكْ وِالعَالَمْ كْرَهْهُمْ عْلَى خَاطِرْهُمْ مَا هُمْشْ مِالعَالَمْ كِيفْ مَا آنَا زَادَا مَا نِيشْ مِالعَالَمْ. ‏15 مَا نُطْلُبْشْ بَاشْ تْهِزّْهُمْ مِالعَالَمْ، آمَا نُطْلُبْ بَاشْ تَحْفِظْهُمْ مِالشِّرِّيرْ. ‏16 هُومَا مَا هُمْشْ مِالعَالَمْ. كِيفْ مَا آنَا مَا نِيشْ مِالعَالَمْ. ‏17 قَدِّسْهُمْ فِي الحَقْ، رَاهِي كِلْمْتِكْ هِيَ الحَقْ. ‏18 كِيفْ مَا بْعَثْتْنِي فِي العَالَمْ آنَا زَادَا بْعَثْتْهُمْ فِي العَالَمْ. ‏19 وْآنَا نْقَدِّسْ رُوحِي عْلَى خَاطِرْهُمْ، بَاشْ هُومَا زَادَا يْكُونُوا مِتْقَدّْسِينْ فِي الحَقْ.

‏20 وْمَا نْصَلِّيشْ مِنْ أَجْلْهُمْ هُومَا آكَاهُو، آمَا زَادَا نْصَلِّي مِنْ أَجْلْ الِّي بَاشْ يِمّْنُوا بِيَّ بِسْبَبْ الكِلْمَة مْتَاعْهُمْ، ‏21 نْصَلِّي مِنْ أَجْلْ إِنّْهُمْ الكُلْهُمْ يْكُونُوا وَاحِدْ، يَا بَابَا كِيفْ مَا إِنْتِ فِيَّ وْآنَا فِيكْ، خَلِّيهُمْ هُومَا زَادَا يْكُونُوا وَاحِدْ فِينَا، بَاشْ العَالَمْ يِمِّنْ الِّي إِنْتِ بْعَثْتْنِي. ‏22 وْآنَا عْطِيتْهُمْ المَجْدْ الِّي عْطِيتْهُولِي، بَاشْ كِيفْ مَا أَحْنَا مِتَّحْدِينْ هُومَا زَادَا يْكُونُوا مِتَّحْدِينْ: ‏23 آنَا فِيهُمْ وْإِنْتِ فِيَّ بَاشْ الوِحْدَة مْتَاعْهُمْ تْكُونْ كَامْلَة وِالعَالَمْ يَعْرِفْ الِّي إِنْتِ بْعَثْتْنِي وِلِّي إِنْتِ تْحِبّْهُمْ كِيفْ مَا حَبِّيتْنِي. ‏24 يَا بَابَا النَّاسْ الِّي عْطِيتْهُمْلِي، نْحِبّْهُمْ يْكُونُوا مْعَايَ وِينْ آنَا مُوجُودْ بَاشْ يْشُوفُوا المَجْدْ مْتَاعِي الِّي إِنْتِ عْطِيتْهُولِي عْلَى خَاطْرِكْ حَبِّيتْنِي قْبَلْ مَا تِتْخْلَقْ الدِّنْيَا. ‏25 يَا بَابَا العَادِلْ، العَالَمْ مَا عَرْفِكْشْ، آمَا آنَا رَانِي عْرَفْتِكْ وْهَاذُومَا عُرْفُوا الِّي إِنْتِ بْعَثْتْنِي. ‏26 وْعَرِّفْتْهُمْ بْإِسْمِكْ، وْبِشْ نْزِيدْ نْعَرِّفْهُمْ بِيهْ بَاشْ مْحَبّْتِكْ لِيَّا تْكُونْ فِيهُمْ وْآنَا نْكُونْ فِيهُمْ.»