إِنْجِيلْ يُوحَنَّا 13

يَسُوعْ يَغْسِلْ سَاقِينْ التْلاَمْذَة

‏1 قْبَلْ عِيدْ الفِصْحْ، يَسُوعْ كَانْ يَعْرِفْ، الِّي سَاعْتُو جَاتْ بَاشْ يِمْشِي مِالعَالَمْ هَاذَا وْيَرْجِعْ لِلآبْ، وْهُوَ حَبْ جْمَاعْتُو الِّي فِي العَالَمْ هَاذَا، حَبّْهُمْ عَلِّخْرْ. ‏2 وَقْتِلِّي كَانْ يِتْعَشَّى مْعَ تْلاَمِذْتُو. وَسْوِسْ بْلِيسْ لْيَهُوذَا وِلْدْ سِمْعَانْ الإِسْخَرْيُوطِي ‏3 يَسُوعْ كَانْ يَعْرِفْ الِّي الآبْ حَطْ فِي يْدِيهْ كُلْ شَيْء، وْإِنُّو جَا مِنْ عِنْدْ اللهْ وْبِشْ يَرْجَعْ للهْ. ‏4 يَاخِي قَصْ عْلَى العْشَاء وْنَحَّى الجِّبَّة مْتَاعُو وِخْذَا مَنْشْفَة وِاتْحَزِّمْ بِيهَا، ‏5 وْصَبْ مَاء فِي سْطَلْ مْتَاعْ غْسِيلْ سَاقِينْ وِبْدَا يَغْسِلْ فِي سَاقِينْ التْلاَمْذَة وِيْنَشِّفْ فِيهُمْ بِالمَنْشْفَة الِّي مِتْحَزِّمْ بِيهَا. ‏6 وَقْتِلِّي وْصُلْ لْسِمْعَانْ بُطْرُسْ، قَالُّو سِمْعَانْ: «يَا رَبْ، إِنْتِ تَغْسِلِّي سَاقَيَّا؟» ‏7 جَاوْبُو يَسُوعْ: «إِنْتِ تَوَّا مَاكِشْ فَاهِمْ آشْ قَاعِدْ نَعْمِلْ، آمَا تَوْ تِفْهِمْ مْبَاعِدْ.» ‏8 قَالُّو بُطْرُسْ: «مُسْتَحِيلْ إِنْتِ تَغْسِلِّي سَاقَيَّا.» جَاوْبُو يَسُوعْ: «إِذَا كَانْ مَا نَغْسِلِّكْشْ سَاقِيكْ مَا عِنْدِكْشْ بَايْ مْعَايَا.» ‏9 يَاخِي قَالُّو سِمْعَانْ بُطْرُسْ: «يَا رَبْ مُوشْ سَاقَيَّا آكَاهُو، آمَا يْدَيَّا وْرَاسِي زَادَا.» ‏10 قَالُّو يَسُوعْ: «الِّي يْعُومْ رَاهُو الكُلُّو نْظِيفْ، وْمَا يِسْتْحَقْ كَانْ لِغْسِيلْ سَاقِيهْ. إِنْتُومَا طَاهْرِينْ، آمَا مَا كُمْشْ الكُلْكُمْ.» ‏11 يَسُوعْ كَانْ يَعْرِفْ شْكُونْ بَاشْ يْخُونُو. هَاذَاكَا عْلاَشْ قَالْ: «مَا كُمْشْ الكُلْكُمْ طَاهْرِينْ.»

‏12 بَعْدْ مَا غْسَلِّلْهُمْ سَاقِيهُمْ لْبِسْ جِبّْتُو وِتَّكَّى فِي بْلاَصْتُو مِنْ جْدِيدْ وْقَالِلْهُمْ: «يَاخِي فَاهْمِينْ الشَّيْء الِّي عْمَلْتُو مْعَاكُمْ؟ ‏13 إِنْتُومَا تْنَادُولِي يَا مُعَلِّمْ وْيَا رَبّْنَا، وْهَاذَا صْحِيحْ عْلَى خَاطِرْنِي آنَا مُعَلِّمْ وْرَبْ. ‏14 إِذَا كَانْ آنَا المُعَلِّمْ وِالرَّبْ وِغْسَلْتِلْكُمْ سَاقِيكُمْ، إِمَّالاَ إِنْتُومَا زَادَا يِلْزِمْكُمْ تَغْسْلُوا سَاقِينْ بْعَضْكُمْ. ‏15 وْآنَا عْطِيتْكُمْ مِثَالْ بَاشْ اتَّبْعُوهْ، وْتَعْمْلُوا مْعَ بْعَضْكُمْ كِيفْ مَا عْمَلْتْ مْعَاكُمْ. ‏16 نْقُلْكُمْ الحَقْ الحَقْ: مَا ثَمَّاشْ خْدِيمْ أَعْظِمْ مِنْ سِيدُو، وْمَا ثَمَّاشْ مَبْعُوثْ أَعْظِمْ مِلِّي بِعْثُو. ‏17 إِمَّالاَ كِفْهِمْتُوا الشَّيْء هَاذَا، صَحَّة لِيكُمْ كَانْ تَعْمْلُوا بِيهْ. ‏18 آنَا مَا نِيشْ قَاعِدْ نَحْكِي عْلِيكُمْ الكُلْكُمْ، آنَا نَعْرِفْ النَّاسْ الِّي خْتَرْتْهُمْ. آمَا رَاهُو الشَّيْء الِّي قَالُو الكْتَابْ لاَزْمُو يْتِمْ، وِلِّي هُوَ: "الِّي يَاكُلْ مْعَايَ فِي الخُبْزْ مْتَاعِي دَارْ عْلِيَّ." ‏19 قُلْتِلْكُمْ عْلَى الشَّيْء هَاذَا قْبَلْ مَا يْصِيرْ، بَاشْ وَقْتِلِّي يَاقَعْ تِمّْنُوا الِّي آنَا هُوَ. ‏20 نْقُلْكُمْ الحَقْ الحَقْ: الِّي يِقْبِلْ الِّي نَبْعْثُو يِقْبِلْنِي. وِلِّي يِقْبِلْنِي رَاهُو يِقْبِلْ الِّي بْعَثْنِي.»

يَسُوعْ يَحْكِي عْلَى الخِيَانَةْ مْتَاعْ يَهُوذَا

(مَتَّى 26‏:20‏-25؛ مَرْقُسْ 14‏:17‏-21؛ لُوقَا 22‏:21‏-23)

‏21 وَقْتِلِّي قَالْ الكْلاَمْ هَاذَا، حَسْ يَسُوعْ رُوحُو مِتْقَلِّقْ وِشْهِدْ وْقَالْ: «نْقُلْكُمْ الحَقْ الحَقْ: وَاحِدْ مِنْكُمْ بَاشْ يْخُونِّي.» ‏22 وِبْقَاوْ التْلاَمْذَة يُخْزْرُوا لِبْعَضْهُمْ وْحَايْرِينْ فِي شْكُونْ يُقْصُدْ بِكْلاَمُو. ‏23 وْوَاحِدْ مِالتْلاَمْذَة، الِّي يَسُوعْ يْحِبُّو، كَانْ مِتَّكِّي بْجَنْبُو. ‏24 هِمْزُو سِمْعَانْ بُطْرُسْ وْقَالُّو: «إِسْأْلُو فِي شْكُونْ يُقْصُدْ بِكْلاَمُو.» ‏25 اتَّكَّى التِّلْمِيذْ عْلَى يَسُوعْ وْسِأْلُو: «شْكُونُو هُوَ، يَا رَبْ؟» ‏26 جَاوِبْ يَسُوعْ: «الِّي نْعَدِّي الخُبْزْ فِي الصْحَنْ وْنَعْطِيهْ يَاكُلْ هُوَ الِّي بَاشْ يْخُونِّي!» وْغَطِّسْ يَسُوعْ قِدْمِةْ الخُبْزْ وِعْطَاهَا لْيَهُوذَا وِلْدْ سِمْعَانْ الإِسْخَرْيُوطِي. ‏27 وْبَعْدْ مَا كْلاَهَا لِبْسُو الشِّيطَانْ. يَاخِي قَالُّو يَسُوعْ: «الِّي نَاوِي بَاشْ تَعْمْلُوا إِزْرِبْ رُوحِكْ وْأَعْمْلُو فِيسَعْ.» ‏28 وْحَتَّى وَاحِدْ مِلِّي قَاعْدِينْ مْعَاهْ عْلَى الطَّاوْلَة مَا فْهِمْ عْلاَشْ قَالُّو الكْلاَمْ هَاذَاكَا. ‏29 وْيَهُوذَا كَانْ مَسْؤُولْ عْلَى صَنْدُوقْ الفْلُوسْ، هَاذَاكَا عْلاَشْ مْشَى فِي بَالْهُمْ الِّي يَسُوعْ وَصَّاهْ بَاشْ يِشْرِي آشْ يِسْتْحَقُّوا لِلعِيدْ، وِلاَّ بَاشْ يَعْطِي حَاجَاتْ لِلفُقَرَاءْ. ‏30 وِخْذَا يَهُوذَا القِدْمَة وِخْرَجْ بِالوَقْتْ. وْكَانِتْ الدِّنْيَا لِيلْ.

الوْصِيَّة الجْدِيدَة

‏31 وْوَقْتِلِّي خْرَجْ يَهُوذَا قَالْ يَسُوعْ: «تَوْ آنَا إِبْنْ الإِنْسَانْ تْمَجِّدْتْ وِالله تْمَجِّدْ فِيَّ. ‏32 إِذَا كَانْ اللهْ تْمَجِّدْ فِيَّ، رَاهُو اللهْ بَاشْ يْمَجِّدْنِي فِي رُوحُو، وْبِشْ يْمَجِّدْنِي عْلَى قْرِيبْ. ‏33 يَا وْلاَدِي، رَانِي بَاشْ نَبْقَى مْعَاكُمْ شْوَيَّة وَقْتْ. بَاشْ تْفَرْكْسُوا عْلِيَّ، وِلِّي قُلْتُو لِليْهُودْ نْقُولْهُولْكُمْ إِنْتُومَا تَوَّا: إِنْتُومَا مَا تْنَجّْمُوشْ تْجِيوْ لِلبْلاَصَة الِّي آنَا مَاشِيلْهَا. ‏34 آنَا نْوَصِّيكُمْ وْصِيَّة جْدِيدَة: إِنّْكُمْ تْحِبُّوا بْعَضْكُمْ. وْكِيفْ مَا آنَا حَبِّيتْكُمْ إِنْتُومَا زَادَا حِبُّوا بْعَضْكُمْ. ‏35 إِذَا كَانْ تْحِبُّوا بْعَضْكُمْ، النَّاسْ الكُلْ بَاشْ يَعْرْفُوا الِّي إِنْتُومَا تْلاَمِذْتِي.»

يَسُوعْ يِتْنَبَّأْ الِّي بُطْرُسْ بَاشْ يُنْكْرُو

(مَتَّى 26‏:31‏-35؛ مَرْقُسْ 14‏:27‏-31؛ لُوقَا 22‏:31‏-34)

‏36 قَالُّو سِمْعَانْ بُطْرُسْ: «يَا رَبْ، إِنْتِ وِينْ مَاشِي؟» جَاوْبُو يَسُوعْ: «إِنْتِ تَوْ مَا تْنَجِّمْشْ اتَّبَّعْنِي لِلبْلاَصَة الِّي آنَا مَاشِيلْهَا، آمَا رَاكْ نْهَارْ مِالنْهَارَاتْ بَاشْ اتَّبَّعْنِي.» ‏37 يَاخِي قَالُّو بُطْرُسْ: «يَا رَبْ، عْلاَشْ مَا انَّجِّمْشْ نْتَبّْعِكْ تَوَّا؟ رَانِي مُسْتْعَدْ نْمُوتْ عْلَى خَاطْرِكْ.» ‏38 جَاوْبُو يَسُوعْ: «يَاخِي إِنْتِ مُسْتْعَدْ بَاشْ تْمُوتْ عْلَى خَاطْرِي؟ نْقُلِّكْ الحَقْ الحَقْ: مَا يْصِيحْ السَّرْدُوكْ كَانْ مَا تُنْكُرْ فِيَّ ثْلاَثَة مَرَّاتْ.»