إِنْجِيلْ لُوقَا 18

مَثَلْ المْرَا الِّي رَاجِلْهَا مِيتْ وِالقَاضِي

‏1 وِعْطَاهُمْ مَثَلْ عْلَى كِيفَاشْ يِلْزِمْهُمْ يْصَلِّيوْ دِيمَا وْمَا يِفْشْلُوشْ ‏2 وْقَالْ: «كَانِتْ ثَمَّة مْدِينَة فِيهَا قَاضِي مَا يْخَافِشْ رَبِّي وْمَا يِحْتَرَمْ حَتَّى إِنْسَانْ. ‏3 وْفِي المْدِينَة هَاذِيكَا كَانِتْ ثَمَّة مْرَا رَاجِلْهَا مِيتْ دِيمَا تْجِيهْ وِتْقُلُّو: "خُوذْلِي حَقِّى مِلِّي ظَالِمْنِي." ‏4 وِبْقَى مُدَّة مِالزْمَانْ مِنْ غِيرْ مَا يَاخْذُلْهَا حَقّْهَا، آمَا مِنْ بَعْدْ قَالْ بِينُو وْبِينْ رُوحُو: "حَتَّى لُوكَانْ آنَا مَا نْخَافِشْ مِنْ رَبِّي وْمَا نِحْتَرِمْ حَتَّى بَشَرْ. ‏5 آمَا عْلَى خَاطِرْ المْرَا هَاذِي تْقَلِّقْ فِيَّ، بَاشْ نَعْطِيهَا حَقْهَا وْهَكَّا مَا عَادِشْ تْجِي دِيمَا وِتْوَجِّعْلِي رَاسِي."» ‏6 وْقَالْ الرَّبْ زَادَا: «اسْمْعُوا القَاضِي الظَّالِمْ آشْ قَالْ. ‏7 إِمَّالاَ اللهْ مَا يُحْكُمْشْ بِالعَدْلْ لِلنَّاسْ الِّي خْتَارْهُمْ وَقْتِلِّي يُطْلْبُوهْ لِيلْ مْعَ نْهَارْ؟ وْبِشْ يْخَلِّيهُمْ يِسْتَنَّاوْ بَرْشَة؟ ‏8 نْقُولِلْكُمْ: رَاهُو بَاشْ يَاخْذُلْهُمْ حَقْهُمْ فِيسَعْ، آمَا وَقْتِلِّي آنَا إِبْنْ الإِنْسَانْ نَرْجَعْ زَعْمَة بَاشْ نَلْقَى إِيمَانْ عْلَى الأَرْضْ؟»

مَثَلْ الفِرِّيسِي وِالمَكَّاسْ

‏9 وِعْطَاهُمْ مَثَلْ آخَرْ عْلَى نَاسْ عِنْدْهُمْ ثِقَة فِي رْوَاحْهُمْ الِّي هُومَا أَبْرَارْ وْيَحْقْرُوا فِي النَّاسْ الأُخْرِينْ. ‏10 «طَلْعُوا زُوزْ مِالنَّاسْ لِلهَيْكِلْ بَاشْ يْصَلِّيوْ، وَاحِدْ فَرِّيسِي وِالآخَرْ يْلِمْ فِي الضَّرَايِبْ. ‏11 وْقُفْ الفَرِّيسِي يْصَلِّي وْقَالْ بِينُو وْبِينْ رُوحُو: "نُشْكْرِكْ يَا اللهْ الِّي آنَا مَا نِيشْ كِيمَا بْقِيِّةْ النَّاسْ الأُخْرِينْ الطَّمَّاعِينْ وِالظَّالْمِينْ وِلِّي يَزْنُوا، وِلاَّ كِيمَا الِّي يْلِمْ فِي الضَّرَايِبْ هَاذَا. ‏12 نْصُومْ مَرّْتِينْ فِي الجِّمْعَة وْنَعْطِي العْشُرْ عْلَى كُلْ مَا نِكْسِبْ." ‏13 آمَا الِّي يْلِمْ فِي الضَّرَايِبْ وْقُفْ مِنْ بْعِيدْ وْمَا حَبِّشْ حَتَّى يْهِزْ عِينِيهْ لِلسْمَاء، آمَا ضْرَبْ سِدْرُو وْقَالْ: "يَا اللهْ ارْحِمْنِي رَانِي مِذْنِبْ." ‏14 نْقُولِلْكُمْ رَاهُو الإِنْسَانْ هَاذَا رْجَعْ لْدَارُو طَاهِرْ مِالذْنُوبْ عَكْسْ الآخَرْ. رَاهُو الِّي يْعَلِّي مِنْ رُوحُو يَهْبِطْ، وِلِّي يْنَقِّصْ مِنْ رُوحُو يَعْلَى.»

يَسُوعْ يْبَارِكْ الوْلاَدْ الصْغَارْ

(مَتَّى 19‏:13‏-15؛ مَرْقُسْ 10‏:13‏-16)

‏15 وْثَمَّة نَاسْ جَابُولُو وْلاَدْ صْغَارْ بَاشْ يْحُطْ عْلِيهُمْ يِدُّو وِيْبَارِكْهُمْ، يَاخِي كِشَافُوهُمْ التْلاَمْذَة لاَمُوا عْلِيهُمْ. ‏16 آمَا يَسُوعْ عَيّْطِلْهُمْ وْقَالْ: «خَلُّوا الصْغَارْ يْجِيوْنِي وْمَا تْحُوزُوهُمْشْ، رَاهِي مَمْلِكْةْ اللهْ لِلنَّاسْ الِّي كِيفْهُمْ. ‏17 نْقُولِلْكُمْ الحَقْ الِّي مَا يِقْبِلْشْ مَمْلِكْةْ اللهْ كِيفْ وْلِدْ صْغِيرْ، عُمْرُو مَا يُدْخْلِلْهَا.»

شْنُوَّة نَعْمِلْ بَاشْ نُورِثْ الحَيَاةْ الأَبَدِيَّة

(مَتَّى 19‏:16‏-30؛ مَرْقُسْ 10‏:17‏-31)

‏18 وْسِأْلُو رَاجِلْ غْنِي وْقَالْ: «يَا مُعَلِّمْ يَا بَاهِي، آشْ نَعْمِلْ بَاشْ نُورِثْ الحَيَاةْ الأَبَدِيَّة؟» ‏19 قَالُّو يَسُوعْ: «عْلاَشْ تْقُلِّي يَا بَاهِي؟ مَا ثَمَّة حَتَّى حَدْ بَاهِي كَانْ اللهْ وَحْدُو. ‏20 إِنْتِ تَعْرِفْ الوْصَايَا: "مَا تَزْنَاشْ، مَا تُقْتُلْشْ، مَا تِسْرِقْشْ، مَا تِشْهِدْشْ بِالكِذْبْ، إِكْرِمْ بُوكْ وْأُمِّكْ."» ‏21 قَالْ: «الحَاجَاتْ هَاذُومَا الكُلْهُمْ نَعْمِلْ فِيهُمْ مِلِّي كُنْتْ صْغِيرْ.» ‏22 وْكِسْمَعْ يَسُوعْ الكْلاَمْ هَاذَا قَالُّو: «مَا زَالِتْ نَاقْصِتِّكْ حَاجَة وَحْدَة، بِيعْ كُلْ مَا تِمْلِكْ وْفَرّْقُو عْلَى الفُقَرَاءْ، وْهَكَّا يْوَلِّي عِنْدِكْ كَنْزْ فِي السْمَاءْ وِمْبَاعِدْ إِيجَا وْتَبَّعْنِي.» ‏23 آمَا الرَّاجِلْ كِسْمَعْ كْلاَمْ يَسُوعْ حْزِنْ بَرْشَة عْلَى خَاطْرُو كَانْ غْنِي بَرْشَة. ‏24 وْكِشَافْ يَسُوعْ الشَّيْء هَاذَا قَالْ: «قَدَّاشْ صْعِيبْ عْلَى النَّاسْ الغُنْيَا بَاشْ يُدْخْلُوا لْمَمْلِكْةْ اللهْ. ‏25 رَاهُو دْخُولْ الجْمَلْ فِي نُقْبَة مْتَاعْ إِبْرَة أسْهِلْ مِنْ إِنُّو وَاحِدْ غْنِي يُدْخُلْ لْمَمْلِكْةْ اللهْ.» ‏26 يَاخِي الِّي يِسْمْعُوا فِي الكْلاَمْ هَاذَا قَالُوا: «إِمَّالاَ شْكُونْ يْنَجِّمْ يُخْلُصْ؟» ‏27 قَالْ يَسُوعْ: «المُسْتَحِيلْ عِنْدْ النَّاسْ، مُمْكِنْ عِنْدْ اللهْ.» ‏28 يَاخِي قَالْ بُطْرُسْ: «هَاوْ أَحْنَا خَلِّينَا كُلْ شَيْء وْتَبِّعْنَاكْ.» ‏29 يَاخِي قَالِلْهُمْ يَسُوعْ: «نْقُلْكُمْ الحَقْ: كُلْ مِنْ خَلَّى دَارْ، وِلاَّ مْرَا، وِلاَّ إِخْوَة، وِلاَّ وَالْدِينْ، وِلاَّ وْلاَدْ عْلَى خَاطِرْ مَمْلِكْةْ اللهْ. ‏30 رَاهُو تَرْجِعْلُو قَدّْهَا بَرْشَة مَرَّاتْ فِي الزْمَانْ هَاذَا، وْيَاخُذْ فِي الزْمَانْ الجَّايْ الحَيَاةْ الأَبَدِيَّة.»

يَسُوعْ تْنَبَّأ مَرَّة أُخْرَى عْلَى مُوتُو

(مَتَّى 20‏:17‏-19؛ مَرْقُسْ 10‏:32‏-34)

‏31 مِنْ بَعْدْ قْعَدْ مْعَ تْلاَمِذْتُو الأَثْنَاشْ وَحَّدْهُمْ وْقَالِلْهُمْ: «هَاوْ بَاشْ نَطْلْعُوا لْأُورْشَلِيمْ وِالحَاجَاتْ الِّي كِتْبُوهَا الأَنْبِيَاءْ عْلِيَّ آنَا إِبْنْ الإِنْسَانْ الكُلْهَا بَاشْ اتِّمْ. ‏32 رَاهُو بَاشْ يْسَلّْمُونِي لِيْدِينْ الشْعُوبْ الأُخْرِينْ وْيِتْمَسْخْرُوا عْلِيَّ وْنِتْهَانْ وْيِبْصْقُوا عْلِيَّ. ‏33 وْيُقْتْلُونِي بَعْدْ مَا يَضْرْبُونِي بِالسُّوطْ وْفِي النْهَارْ الثَّالِثْ نْقُومْ.» ‏34 آمَا هُومَا مَا فِهْمُوا حَتَّى شَيْء، وِالحَاجَاتْ هَاذِي كَانِتْ مَحْجُوبَة عْلِيهُمْ وْمَا فَهْمُوشْ الشَّيْء الِّي تْقَالْ.

يَسُوعْ يِشْفِى الأَعْمَى

(مَتَّى 20‏:29‏-34؛ مَرْقُسْ 10‏:46‏-52)

‏35 وْكِوْصُلْ بِحْذَا أَرِيحَا، كَانْ ثَمَّة وَاحِدْ أَعْمَى قَاعِدْ بِجْنَبْ الطْرِيقْ يُطْلُبْ. ‏36 وْكِسْمَعْ النَّاسْ مِتْعَدِّينْ، سْإِلْ شْنُوَّة الِّي قَاعِدْ يْصِيرْ. ‏37 يَاخِي قَالُولُو: «يَسُوعْ النَّاصْرِي مِتْعَدِّي مِنْ هْنَا.» ‏38 يَاخِي بْدَا يْعَيِّطْ وِيْقُولْ: «يَا يَسُوعْ وِلْدْ دَاوُدْ، ارْحِمْنِي.» ‏39 يَاخِي النَّاسْ الِّي قَاعْدِينْ يِمْشِيوْ مِالقُدَّامْ صَاحُوا عْلِيهْ بَاشْ يُسْكُتْ، آمَا هُوَ زَادْ صَاحْ وْقَالْ: «يَا وِلْدْ دَاوُدْ ارْحِمْنِي.» ‏40 وْقُفْ يَسُوعْ وِأْمَرْ بَاشْ يْجِيبُوهُولُو، وْكِقْرُبْ مِنُّو سِأْلُو: ‏41 «شْنُوَّة تْحِبّْنِي نَعْمِلِّكْ؟» قَالْ: «يَا سِيدِي، نْحِبْ نَرْجَعْ نْشُوفْ!» ‏42 يَاخِي قَالُّو يَسُوعْ: «أَرْجِعْ شُوفْ مِنْ جْدِيدْ، إِيمَانِكْ شْفَاكْ.» ‏43 وْبِالوَقْتْ وَلَّى يْشُوفْ، وْتَبّْعُو وْهُوَ يْسَبَّحْ فِي اللهْ، وِالنَّاسْ الكُلْهُمْ كِشَافُوا الشَّيْء هَاذَا مَجّْدُوا اللهْ.