إِنْجِيلْ لُوقَا 10

المَسِيحْ يَبْعِثْ الثْنِينْ وْسَبْعِينْ تِلْمِيذْ

‏1 وْبَعْدْ هَاذَا زَادْ يَسُوعْ خْتَارْ ثْنِينْ وْسَبْعِينْ رَاجِلْ وِبْعَثْهُمْ كُلْ زُوزْ مْعَ بْعَضْهُمْ بَاشْ يِسْبْقُوهْ لِلمُدُنْ وِالقُرَى الِّي نَاوِي بَاشْ يِمْشِيلْهُمْ الكُلْهُمْ. ‏2 وْقَالِلْهُمْ: «الصَّابَة بَرْشَة آمَا الحَصَّادَا شْوَيَّة، اطْلْبُوا مِنْ مُولَى الحْصَادْ بَاشْ يَبْعِثْ حَصَّادَا لِلصَّابَة مْتَاعُو. ‏3 إِمْشِيوْ وْهَانِي نَبْعِثْكُمْ كِيفْ العْلاَلِشْ بِينْ الذْيُوبَا. ‏4 مَا تْهِزُّوشْ مْعَاكُمْ فْلُوسْ، وِلاَّ صُرَّة، وِلاَّ صَنْدَالْ، وْمَا تْسَلّْمُوا عْلَى حَتَّى حَدْ فِي الطْرِيقْ. ‏5 وِالدَّارْ الِّي تُدْخْلُوهَا قُولُوا فِي الأُوِّلْ: "السَّلاَمْ عْلَى امَّالِي الدَّارْ." ‏6 إِذَا كَانْ ثَمَّة شْكُونْ يْحِبْ السَّلاَمْ سْلاَمْكُمْ رَاهُو عْلِيهْ هُوَ، وْإِذَا كَانْ مَا ثَمَّاشْ رَاهُو سْلاَمْكُمْ بَاشْ يَرْجْعِلْكُمْ. ‏7 وْتُقْعْدُوا فِي الدَّارْ هَاذِيكَا، تَاكْلُوا وْتُشْرْبُوا مِلِّي عِنْدْهُمْ، رَاهُو الخَدَّامْ يِسْتْحَقْ أَجْرُو وْمَا تِمْشُوشْ مِنْ دَارْ لْدَارْ. ‏8 وِالمْدِينَة الِّي تُدْخْلُوهَا وْأُمَّالِيهَا يِقْبْلُوكُمْ، المَاكْلَة الِّي يْجِيبُوهَالْكُمْ كُولُوهَا. ‏9 وِاشْفيوْ المُرْضَى الِّي فِيهَا وُقُولُولْهُمْ: "رَاهِي مَمْلِكْةْ اللهْ قْرِيبَة لِيكُمْ." ‏10 وِالمْدِينَة الِّي تُدْخْلُوهَا وْأُمَّالِيهَا مَا يِقْبْلُوكُمْشْ، أُخْرْجُوا لِلشْوَارِعْ مْتَاعْهَا وْقُولُوا: ‏11 "حَتَّى غْبَارْ المْدِينَة مْتَاعْكُمْ الِّي لاَصِقْ فِي سَاقِينَا نُنْفْضُوهْ عْلِيكُمْ، أَعْرْفُوا الِّي مَمْلِكْةْ اللهْ قْرِيبَة." ‏12 نْقُولِلْكُمْ رَاهِي حَالِةْ مْدِينِةْ سَدُومْ فِي يُومْ الحْسَابْ بَاشْ تْكُونْ خِيرْ مِنْ حَالِةْ المْدِينَة هَاذِيكَا!»

المُدُنْ الكَافْرَة

(مَتَّى 11‏:20‏-24)

‏13 «يَا وِيلِكْ يَا كُورَزِينْ! يَا وِيلِكْ يَا بِيتْ ‌صَيْدَا! لُوكَانْ المُعْجْزَاتْ الكْبَارْ الِّي تْعَمْلُوا فِي وُسْطْكُمْ تْعَمْلُوا فِي صُورْ وْصَيْدَا، تَالِي رَاهُمْ تَابُوا مِنْ قْدِيمْ الزْمَانْ، وْهُومَا لاَبْسِينْ الشْكَايِرْ وْقَعْدُوا عْلَى الرْمَادْ. ‏14 آمَا صُورْ وْصَيْدَا حَالِتْهُمْ بَاشْ تْكُونْ خِيرْ مِنْ حَالِتْكُمْ إِنْتُومَا فِي يُومْ الحْسَابْ. ‏15 وْإِنْتِ يَا كَفْرْنَاحُومْ يَاخِي بَاشْ تَطْلِعْ لِلسْمَاء؟ رَاكْ بَاشْ تَهْبِطْ لْقَاعْ الهَاوْيَة. ‏16 الِّي يَسْمْعِلْكُمْ إِنْتُومَا، يِسْمَعْلِي آنَا، وِلِّي يُرْفُضْكُمْ إِنْتُومَا، يُرْفُضْنِي آنَا، وِلِّي يُرْفُضْنِي يُرْفُضْ الِّي بْعَثْنِي.»

‏17 وْمِنْ بَعْدْ رَجْعُوا الإِثْنِينْ وْسَبْعِينْ فَرْحَانِينْ وْقَالُوا: «يَا رَبْ حَتَّى مِالشْوَاطِنْ اطِّيعْ فِينَا بْإِسْمِكْ.» ‏18 يَاخِي قَالِلْهُمْ يَسُوعْ: «شُفْتْ الشِّيطَانْ طَايِحْ مِالسْمَاءْ كِيفْ البَرْقْ. ‏19 وْآنَا عْطِيتْكُمْ سُلْطَة بَاشْ تَعْفْسُوا عْلَى اللْفَاعِي وِالعْقَارِبْ وِالقُوَّة مْتَاعْ العْدُو الكُلْهَا وْحَتَّى شَيْء مَا يْضُرّْكُمْ. ‏20 آمَا مَا تَفْرْحُوشْ الِّي الأَرْوَاحْ الشِّرِّيرَة اطِّيعْ فِيكُمْ، آمَا أَفْرْحُوا بِلِّي أَسَامِيكُمْ مَكْتُوبَة فِي السْمَاوَاتْ.»

اللهْ يْقُولْ عْلَى أَسْرَارُو لِلمِتْوَاضْعِينْ

(مَتَّى 11‏:25‏-27؛ 13‏:16‏-17)

‏21 وْفِي الوَقْتْ هَاذَاكَا فْرَحْ يَسُوعْ بِالرُّوحْ القُدُسْ وْقَالْ: «نِحْمْدِكْ يَا الآبْ، رَبْ السْمَاءْ وِالأَرْضْ، عْلَى خَاطْرِكْ خَبِّيتْ الحَاجَاتْ هَاذِي عْلَى الحُكَمَاءْ وِالفَاهْمِينْ وِكْشِفْتْهَا لِلوْلاَدْ الصْغَارْ، إِي نْعَمْ يَا الآبْ الشَّيْء هَاذَا يْرَضِّيكْ. ‏22 كُلْ شَيْء تِعْطَالِي مِنْ عِنْدْ بَابَا، وْحَتَّى حَدْ مَا يَعْرِفْ شْكُونْ هُوَ الإِبْنْ إِلاَّ الآبْ وِلاَّ شْكُونْ هُوَ الآبْ إِلاَّ الإِبْنْ وِلِّي الإِبْنْ يْحِبْ يْقُلُّو عْلِيهْ.»

‏23 وْمِنْ بَعْدْ تْلَفِّتْ لِلتْلاَمْذَة وْقَالِلْهُمْ وَحَّدْهُمْ: «صَحَّة لِلعِينِينْ الِّي تْشُوفْ الِّي إِنْتُومَا تْشُوفُوا فِيهْ. ‏24 آنَا نْقُولِلْكُمْ الِّي بَرْشَة مُلُوكْ وْأَنْبِيَاءْ تْمَنَّاوْ بَاشْ يْشُوفُوا الِّي تْشُوفُوا فِيهْ وْمَا شَافُوهِشْ، وْبَاشْ يِسْمْعُوا الِّي إِنْتُومَا تِسْمْعُوا فِيهْ وْمَا سِمْعُوهِشْ.»

السَّامْرِي الطَّيِّبْ

‏25 جَا وَاحِدْ مِنْ عُلَمَاءْ الشَّرِيعَة بَاشْ يْجَرَّبْ يَسُوعْ وْقَالْ: «يَا مُعَلِّمْ، شْنُوَّة نَعْمِلْ بَاشْ نُورِثْ الحَيَاةْ الأَبَدِيَّة؟» ‏26 قَالُّو يَسُوعْ: «آشْ مَكْتُوبْ فِي الشَّرِيعَة؟ وْكِيفَاشْ تَقْرَاهْ؟» ‏27 جَاوْبُو: «حِبْ الرَّبْ إِلاَهِكْ بْقَلْبِكْ الكُلُّو وْرُوحِكْ الكُلْهَا وْقُوتِكْ الكُلْهَا وْعَقْلِكْ الكُلُّو وْحِبْ قْرِيبِكْ كِيفْ مَا تْحِبْ رُوحِكْ.» ‏28 قَالُّو يَسُوعْ: «إِنْتِ جَاوِبْتْ بِالصْحِيحْ أَعْمِلْ بِالشَّيْء هَاذَا وْإِنْتِ بَاشْ تَحْيَى.» ‏29 آمَا هُوَ حَبْ يْدَافِعْ عْلَى رُوحُو وِسْإِلْ يَسُوعْ: «شْكُونُو هُوَ جَارِي؟» ‏30 جَاوْبُو يَسُوعْ وْقَالْ: «ثَمَّة رَاجِلْ كَانْ هَابِطْ مِنْ أُورْشَلِيمْ لْأَرِيحَا، يَاخِي طَاحْ بِينْ يْدِينْ جْمَاعَة مْجَرّْمَة، نَحَّاوْلُو حْوَايْجُو وْضَرْبُوهْ، وْمِنْ بَعْدْ مْشَاوْ وْخَلاَّوْهْ بِينْ الحَيَاةْ وِالمُوتْ. ‏31 وْبِالصُّدْفَة كَانْ ثَمَّة كَاهِنْ هَابِطْ فِي الطْرِيقْ هَاذَاكَا، وَقْتِلِّي شَافُو خَلاَّهْ وِتْعَدَّى عْلَى الجْنَبْ الآخَرْ. ‏32 تْعَدَّى وَاحِدْ مِنْ عَرْشْ لاَوِي وْكِوْصُلْ لِلبْلاَصَة هَاذِيكَا، خْزَرْلُو وْخَلاَّهْ وِتْعَدَّى عْلَى الجْنَبْ الآخَرْ. ‏33 آمَا ثَمَّة وَاحِدْ سَامْرِي مْسَافِرْ جَا لْغَادِي وْكِشَافُو حَنْ عْلِيهْ. ‏34 مْشَالُو وْدَاوَالُو جْرُوحُو بَعْدْ مَا صَبّْلُو عْلِيهُمْ الزِّيتْ وِالشْرَابْ. مِنْ بَعْدْ رَكّْبُو عْلَى بْهِيمُو وْوَصّْلُو لِلوْكَالَة وْتِلْهَى بِيهْ. ‏35 وْمِالغُدْوَة كِجَا خَارِجْ عْطَى لْمُولَى الوْكَالَة شْوَيَّة فْلُوسْ وْقَالُّو: "اتْلْهَى بِيهْ، وِلِّي بَاشْ تُصْرْفُو عْلِيهْ، كِنَرْجَعْ نْرُدْهُمْلِكْ." ‏36 حَسْبْ رَايِكْ شْكُونُو مِنْ الثْلاَثَة هَاذُومَا قْرِيبْ الرَّاجِلْ الِّي طَاحْ بِينْ يْدِينْ المْجَرّْمَة؟» ‏37 جَاوِبْ: «الِّي حَنْ عْلِيهْ!» يَاخِي قَالُّو يَسُوعْ: «إِمَّالاَ إِمْشِي وْأَعْمِلْ نَفْسْ الشَّيْء.»

يَسُوعْ فِي دَارْ مَرْثَى وْمَرْيِمْ

‏38 وَقْتِلِّي هُومَا فِي الثْنِيَّة دْخَلْ يَسُوعْ لْقَرْيَة، يَاخِي سْتَقْبْلِتُّو مْرَا اسْمْهَا مَرْثَى فِي دَارْهَا. ‏39 وْكَانِتْ عِنْدْهَا أُخْتْهَا اسْمْهَا مَرْيَمْ قَعْدِتْ عِنْدْ سَاقِينْ يَسُوعْ تِسْمَعْ فِي الكْلاَمْ الِّي يْقُولْ فِيهْ. ‏40 آمَا مَرْثَى كَانِتْ لاَهْيَة وْتَعْمِلْ فِي بَرْشَة خِدْمَة وْقَالِتْ: «يَا رَبْ، يَاخِي بَاهِي تَوَّا كِأُخْتِي خَلاَّتْنِي نِخْدِمْ وَحْدِي؟ قُولِلْهَا تْعَاوِنِّي!» ‏41 آمَا يَسُوعْ جَاوِبْهَا وْقَالْ: «مَرْثَى! مَرْثَى! إِنْتِ مَهْمُومَة وْقَالْقَة عْلَى بَرْشَة حَاجَاتْ. ‏42 رَاهُو ثَمَّة وَاحِدْ بَرْكْ إِنْتِ مِحْتَاجَة لِيهْ، وْمَرْيِمْ خْتَارِتْ النْصِيبْ البَاهِي الِّي حَتَّى حَدْ مَا هُوَ بَاشْ يْفُكّْهُولْهَا.»