إِنْجِيلْ لُوقَا 8

النْسَاء الِّي عَاوْنُوا يَسُوعْ وِتْلاَمِذْتُو

‏1 بَعْدْ هَاذَا بْدَا يَسُوعْ يْسَافِرْ فِي المُدُنْ وِالقُرَى يُوعِظْ وِيْبَشِّرْ بْمَمْلِكْةْ اللهْ وْكَانُوا مْعَاهْ تْلاَمِذْتُو الأَثْنَاشْ ‏2 وِالنْسَاء الِّي شْفَاهُمْ يَسُوعْ مِالأرْوَاحْ الشِّرِّيرَة وِالأَمْرَاضْ، وِلِّي هُومَا: مَرْيَمْ الِّي يْنَادِيوْلْهَا المَجْدَلِيَّة الِّي خَرِّجْ مِنْهَا سَبْعَة شْوَاطِنْ. ‏3 وْيُوَنَّا مَرْةْ خُوزِي الوْكِيلْ مْتَاعْ هِيرُودُسْ وْسُوسَنَّة وْبَرْشَة غِيرْهُمْ الِّي كَانُوا يْعَاوْنُوا فِيهُمْ.

مَثَلْ الفَلاَّحْ

(مَتَّى 13‏:1‏-9؛ مَرْقُسْ 4‏:1‏-9)

‏4 وْكِتْلَمُّوا بِيهْ النَّاسْ الِّي جَاوْ مِنْ المُدُنْ الكُلْ كَلِّمْهُمْ يَسُوعْ بِالأَمْثَالْ ‏5 وْقَالْ: «خْرَجْ الفَلاَّحْ بَاشْ يَزْرَعْ الزِّرِّيعَة، وَقْتِلِّي هُوَ يَزْرَعْ طَاحِتْ شْوَيَّة مِنْهَا فِي الثْنِيَّة وِتْعِفْسِتْ بِالسَّاقِينْ وِكْلاَتْهَا طْيُورْ السْمَاءْ. ‏6 وِشْوَيَّة أُخْرِينْ جَاوْ فِي بْلاَصَة فِيهَا الحْجَرْ، وْكِنِبْتُوا، يِبْسُوا عْلَى خَاطِرْهُمْ مَا كَانِشْ تِحْتْهُمْ الثْرَى. ‏7 وِشْوَيَّة طَاحُوا فِي وُسْطْ الشُّوكْ، يَاخِي نْبِتْ مْعَاهُمْ الشُّوكْ وِخْنَقْهُمْ. ‏8 وِشْوَيَّة مِالزِّرِّيعَة طَاحِتْ فِي أَرْضْ بَاهْيَة، وْكِنِبْتِتْ جَاتْ صَابَة وْجَابِتْ مْيَاةْ مَرَّة قَدْ الِّي تِزْرَعْ.» وْبَعْدْ هَاذَا نَادَى وْقَالْ: «الِّي عَنْدُو وِذْنِينْ خَلِّيهْ يِسْمَعْ.»

عْلاَشْ المَثَلْ هَاذَا

(مَتَّى 13‏:10‏-17؛ مَرْقُسْ 4‏:10‏-12)

‏9 وْسِأْلُوهْ تْلاَمِذْتُو عْلَى المَعْنَى مْتَاعْ المَثَلْ هَاذَا. ‏10 يَاخِي قَالْ: «إِنْتُومَا تِعْطَالْكُمْ بَاشْ تَعْرْفُوا الأَسْرَارْ مْتَاعْ مَمْلِكْةْ اللهْ. آمَا الأُخْرِينْ نْكَلِّمْهُمْ بِالأَمْثَالْ بَاشْ يُخْزْرُوا وْمَا يْشُوفُوشْ وْيِسْمْعُوا وْمَا يِفْهْمُوشْ.»

تَفْسِيرْ مَثَلْ الفَلاَّحْ

(مَتَّى 13‏:18‏-23؛ مَرْقُسْ 4‏:13‏-20)

‏11 «وْهَاذَا تَفْسِيرْ المَثَلْ: الزِّرِّيعَة هِيَ كِلْمِةْ اللهْ. ‏12 وِلِّي طَاحُوا فِي الثْنِيَّة هُومَا الِّي سَمْعُوا الكِلْمَة، مِنْ بَعْدْ يْجِي بْلِيسْ وْيَخْطِفْ الكِلْمَة مِنْ قْلُوبْهُمْ بَاشْ مَا يِمّْنُوشْ وْيُخْلْصُوا. ‏13 وِلِّي جَاوْ فِي الحْجَرْ، هُومَا الِّي يِقْبْلُوا الكِلْمَة وَقْتِلِّي يِسْمْعُوهَا وْيَفْرْحُوا بِيهَا آمَا مَا عِنْدْهُمْشْ عْرُوقْ؛ يِمّْنُوا لْمُدَّة قْصِيرَة، وْكِيْجِي وَقْتْ صْعِيبْ يِتْرَاجْعُوا عْلَى إِيمَانْهُمْ. ‏14 وِلِّي جَاوْ فِي وُسْطْ الشُّوكْ هُومَا الِّي يِسْمْعُوا الكِلْمَة وْمِنْ بَعْدْ يِمْشِيوْ وْتُخْنُقْهُمْ الهْمُومْ وِالغْنَى وِالشْهَاوِي مْتَاعْ الدِّنْيَا وْمَا يْجِيبُوشْ زِرِّيعَة بَاهْيَة. ‏15 آمَا الِّي جَاوْ فِي أَرْضْ بَاهْيَة هُومَا الِّي يِسْمْعُوا الكِلْمَة وْيَحْفْظُوهَا بْقَلْبْ بَاهِي وْصَادِقْ وْيُصْبْرُوا حَتَّى لِينْ يْجِيبُوا ثَمَرْ.»

مَثَلْ الفْنَارْ

(مَرْقُسْ 4‏:21‏-25؛ مَتَّى 5‏:15)

‏16 «وْمَا ثَمَّاشْ حَتَّى وَاحِدْ يْشَعِّلْ فْنَارْ وِيْغَطِّيهْ بْقَصْعَة وِلاَّ يْحُطُّو تَحْتْ السْرِيرْ، آمَا رَاهُو يْحُطُّو فِي بْلاَصَة عَالْيَة بَاشْ النَّاسْ وَقْتِلِّي يُدْخْلُوا يْشُوفُوا الضَّوْ. ‏17 رَاهُو مَا ثَمَّاشْ حَتَّى شَيْء مْخُبِّي مُوشْ بَاشْ يِتْكْشِفْ وْمَا ثَمَّاشْ حَتَّى شَيْء مَسْتُورْ مُوشْ بَاشْ يُظْهُرْ وْيِتْكْشِفْ لِلنُّورْ. ‏18 إِمَّالاَ رُدُّوا بَالْكُمْ وْأَعْرْفُوا كِيفَاشْ تِسْمْعُوا. رَاهُو الِّي عَنْدُو بَاشْ يِتْزَادْلُو أَكْثِرْ وِلِّي مَا عِنْدُوشْ حَتَّى الِّي مَاشِي فِي بَالُو الِّي هُوَ عَنْدُو بَاشْ يِتْفَكّْلُو.»

أُمْ يَسُوعْ وْإِخْوْتُو

(مَتَّى 12‏:46‏-50؛ مَرْقُسْ 3‏:31‏-35)

‏19 وْجَاوْ أُمْ يَسُوعْ وْإِخْوْتُو وْمَا نَجّْمُوشْ يُوصْلُولُو بِسْبَبْ الزْحَامْ. ‏20 يَاخِي قَالُولُو: «رَاهِي أُمِّكْ وْإِخْوْتِكْ وَاقْفِينْ البَرَّة وِيْحِبُّوا يْشُوفُوكْ.» ‏21 آمَا يَسُوعْ جَاوِبْهُمْ وْقَالْ: «أُمِّي وْإِخْوْتِي هُومَا الِّي يِسْمْعُوا كِلْمِةْ اللهْ وِيْطَبّْقُوهَا.»

يَسُوعْ يْهَدِّي العَاصْفَة

(مَتَّى 8‏:23‏-27؛ مَرْقُسْ 4‏:35‏-41)

‏22 وْفِي نْهَارْ مِنْ النْهَارَاتْ رْكِبْ يَسُوعْ فِي فْلُوكَة مْعَ تْلاَمِذْتُو وْقَالِلْهُمْ: «هَيَّا نِتْعَدَّاوْ لِلشَّطْ المْقَابِلْ مْتَاعْ البُحَيْرَة.» وِمْشَاوْ. ‏23 وَقْتِلِّي هُومَا مْبَحّْرِينْ يَسُوعْ رْقَدْ، وْفِي لَحْظَة جَاتْ عَاصْفَة وْرِيحْ قْوِيَّة. وِبْدَاتْ الفْلُوكَة تِتْعَبَّى بِالمَاء وْوَلاَّوْ فِي خْطَرْ. ‏24 يَاخِي قُرْبُوا مِنْ يَسُوعْ وْفَيّْقُوهْ وْقَالُوا: «يَا سِيدْنَا، يَا سِيدْنَا، رَانَا بَاشْ نْمُوتُوا!» يَاخِي قَامْ يَسُوعْ وِأْمَرْ الرِّيحْ وِالمَاء الهَايِجْ، يَاخِي هْدَاوْ وِالدِّنْيَا الكُلْهَا رَاضِتْ. ‏25 مِنْ بَعْدْ قَالِلْهُمْ: «وِينُو إِيمَانْكُمْ؟» وِتْعَجّْبُوا وْوَلُّوا خَايْفِينْ وِبْدَا كُلْ وَاحِدْ مِنْهُمْ يْقُولْ لِلآخَرْ: «إِمَّالاَ شْكُونُو هَاذَا، بَاشْ يُوصِلْ حَتَّى مِالرِّيحْ وِالمَاء يُأْمُرْهُمْ وْهُومَا يْطِيعُوهْ؟»

تَخْرِيجْ الشْوَاطِنْ وْغَرْقَانْ الحْلاَلِفْ

(مَتَّى 8‏:28‏-34؛ مَرْقُسْ 5‏:1‏-20)

‏26 وْوُصْلُوا لْمَنْطِقْةْ الجَرَّاسِيِّينْ المْقَابْلَة الجَلِيلْ. ‏27 وْكِهْبَطْ لِلبَرْ عَرْضُو رَاجِلْ مِالمْدِينَة مَسْكُونْ بِالشْوَاطِنْ وْمِنْ مُدَّة طْوِيلَة مَا يِلْبِسْ فِي حَتَّى شَيْء وْمَا يُسْكُنْشْ فِي دَارْ، آمَا يُسْكُنْ بِينْ القْبُورْ. ‏28 وْدُوبْ مَا شَافْ يَسُوعْ صَاحْ وْطَاحْ قُدَّامُو، وْقَالْ بْصُوتْ عَالِي: «آشْ بِينِي وْبِينِكْ يَا يَسُوعْ إِبْنْ اللهْ العَالِي؟ نِتْرَجَّاكْ بَاشْ مَا تْعَذِّبْنِيشْ.» ‏29 وِأْمَرْ يَسُوعْ الرُّوحْ المَنْزُوسْ بَاشْ يُخْرُجْ مِالرَّاجِلْ، عْلَى خَاطْرُو كَانْ سَاكْنُو مِنْ مُدَّة طْوِيلَة وْكَانْ كُلْ مَا يَرْبْطُوهْ بِالسْلاَسِلْ وِلاَّ بِالحْدِيدْ بَاشْ يْشِدُّوهْ يْقَطِّعْهُمْ وِالشِّيطَانْ يْهِزُّو لِلخْلاَء ‏30 يَاخِي سِأْلُو يَسُوعْ: «آشْ إِسْمِكْ؟» قَالْ: «بَطَيُونْ!» عْلَى خَاطِرْهُمْ كَانُوا جَيْشْ كْبِيرْ مِالشْوَاطِنْ دَخْلُوا فِي الرَّاجِلْ هَاذَا. ‏31 وِتْشَحّْتُوهْ بَاشْ مَا يُأْمُرْهُمْشْ بَاشْ يَرْجْعُوا لِلهَاوْيَة.

‏32 وْكَانِتْ ثَمَّة رِسْلَة كْبِيرَة مْتَاعْ حْلاَلِفْ قَاعْدَة سَارْحَة فِي الجْبَلْ يَاخِي تْشَحّْتُوهْ بَاشْ يْخَلِّيهُمْ يُدْخْلُوا فِيهُمْ، وْيَسُوعْ خَلاَّهُمْ يَعْمْلُوا الشَّيْء هَاذَا. ‏33 يَاخِي الشْوَاطِنْ خَرْجُوا مِالرَّاجِلْ وْدَخْلُوا فِي الحْلاَلِفْ، يَاخِي جْرَاوْ الحْلاَلِفْ لْحَرْفْ الجْبَلْ وْهَبْطُوا الكُلْهُمْ فِي البُحَيْرَة وْغَرْقُوا. ‏34 وَقْتِلِّي سُرَّاحْ الحْلاَلِفْ شَافُوا الِّي صَارْ هَرْبُوا لِلمْدِينَة وِالقُرَى وْنَشْرُوا الخْبَرْ. ‏35 يَاخِي خَرْجُوا النَّاسْ بَاشْ يْشُوفُوا شْنُوَّة الِّي وْقَعْ، وْجَاوْ لْيَسُوعْ وِلْقَاوْ الرَّاجِلْ الِّي خُرْجِتْ مِنُّو الشْوَاطِنْ لاَبِسْ حْوَايْجُو وْعَقْلُو لاَبَاسْ عْلِيهْ وْقَاعِدْ عَاقِلْ بِحْذَا سَاقِينْ يَسُوعْ، يَاخِي خَافُوا. ‏36 وِالنَّاسْ الِّي شَافُوا الِّي صَارْ خَبّْرُوهُمْ كِيفَاشْ الرَّاجِلْ الِّي سَاكْنِتُّو الشْوَاطِنْ تِشْفَى. ‏37 يَاخِي امَّالِي مْدِينِةْ الجَرَّاسِيِّينْ الكُلْهُمْ طَلْبُوا مِنْ يَسُوعْ بَاشْ يَرْحِلْ مِنْ مْدِينِتْهُمْ عْلَى خَاطِرْهُمْ خَافُوا بَرْشَة، يَاخِي يَسُوعْ طْلَعْ فِي الفْلُوكَة وِرْجَعْ. ‏38 آمَا الرَّاجِلْ الِّي خَرْجِتْ مِنُّو الشْوَاطِنْ تْشَحِّتْ يَسُوعْ بَاشْ يِمْشِي مْعَاهْ، آمَا يَسُوعْ مَا خَلاَّهِشْ وْقَالُّو: ‏39 «أَرْجِعْ لْدَارِكْ وِاحْكِي عْلَى الحَاجَاتْ الكُلْهَا الِّي عْمَلْهَا اللهْ مْعَاكْ.» يَاخِي مْشَى يَحْكِي عَلِّي عِمْلُو يَسُوعْ مْعَاهْ فِي المْدِينَة الكُلْهَا.

يَسُوعْ يِحْيِي بِنْتْ يَايْرُسْ وْيِشْفِي مْرَا

(مَتَّى 9‏:18‏-26؛ مَرْقُسْ 5‏:21‏-43)

‏40 وْكِرْجَعْ يَسُوعْ رَحّْبُوا بِيهْ النَّاسْ عْلَى خَاطِرْهُمْ الكُلْهُمْ كَانُوا يِسْتَنَّاوْ فِيهْ وَقْتَاشْ بَاشْ يَرْجَعْ. ‏41 وْإِذَا بْرَاجِلْ إِسْمُو يَايْرُسْ، وِلِّي هُوَ رَئِيسْ الشْيُوخْ مْتَاعْ المَجْمَعْ جَا وْطَاحْ قُدَّامْ سَاقِينْ يَسُوعْ وِتْشَحّْتُو بَاشْ يِمْشِي مْعَاهْ لْدَارُو. ‏42 عْلَى خَاطِرْ عَنْدُو طُفْلَة وَحْدَة وِعْمُرْهَا اثْنَاشِنْ سْنَة وِقْريبْ تْمُوتْ.

وَقْتِلِّي كَانْ مَاشِي زَاحْمُوهْ بَرْشَة نَاسْ ‏43 وْكَانِتْ ثَمَّة مْرَا مْرِيضَة بْنَزِيفْ دَمْ مِنْ اثْنَاشِنْ سْنَة، بِالرَّغْمْ الِّي هِيَ صَرْفِتْ كُلْ مَا عِنْدْهَا عْلَى الطُّبَّة وْمَا بْرَاتْ عْلَى يِدْ حَتَّى وَاحِدْ. ‏44 يَاخِي جَاتْ لْيَسُوعْ مِنْ تَالِي وْمَسِّتْ الطّْرَفْ مْتَاعْ دَبْشُو، وْبِالوَقْتْ النَّزِيفْ وْقُفْ. ‏45 يَاخِي قَالْ يَسُوعْ: «شْكُونْ الِّي مَسّْنِي؟» وْكِالكُلْهُمْ نُكْرُوا، قَالْ بُطْرُسْ: «يَا سِيدْنَا النَّاسْ دَايْرِينْ بِيكْ وِيْزَاحْمُوا فِيكْ.» ‏46 يَاخِي قَالْ يَسُوعْ: «ثَمَّة وَاحِدْ مَسّْنِي عْلَى خَاطِرْنِي حَسِّيتْ الِّي ثَمَّة قُوَّة خَرْجِتْ مِنِّي.» ‏47 وَقْتِلِّي المْرَا شَافِتْ رُوحْهَا الِّي هِيَ بَاشْ تِتْكْشِفْ جَاتْ خَايْفَة وِرْمَاتْ رُوحْهَا قُدَّامْ سَاقِيهْ وْقَالِتْ قُدَّامْ النَّاسْ الكُلْ عْلاَشْ مَسِّتُّو وْكِيفَاشْ بْرَاتْ بِالوَقْتْ. ‏48 يَاخِي قَالِلْهَا يَسُوعْ: «يَا بِنْتِي إِيمَانِكْ شْفَاكْ، إِمْشِي فِي الأَمَانْ!»

‏49 وَقْتِلِّي هُوَ يِتْكَلِّمْ جَا وَاحِدْ بَاعْثِينُو مِنْ بِيتْ رَئِيسْ المَجْمَعْ وْقَالُّو: «بِنْتِكْ مَاتِتْ وْزَايِدْ تْشَقِّي فِي المُعَلِّمْ.» ‏50 كِسْمَعْ يَسُوعْ الشَّيْء هَاذَا، قَالُّو: «مَا تْخَافِشْ إِمِّنْ بَرْكْ، وْهِيَ بَاشْ تْكُونْ لاَبَاسْ.» ‏51 وْكِوْصُلْ لْدَارْ رَئِيسْ المَجْمَعْ، مَا خَلَّى حَتَّى وَاحِدْ يُدْخُلْ مْعَاهْ كَانْ بُطْرُسْ وْيُوحَنَّا وْيَعْقُوبْ وْبُو الطُّفْلَة وْأُمّْهَا. ‏52 النَّاسْ الكُلْ كَانُوا يِبْكِيوْ وْيِنْدْبُوا عْلِيهَا، قَالِلْهُمْ يَسُوعْ: «مَا تِبْكِيوْشْ رَاهِي مَا مَاتِتْشْ آمَا هِيَ رَاقْدَة.»

‏53 يَاخِي ضَحْكُوا عْلِيهْ عْلَى خَاطِرْهُمْ يَعْرْفُوا الِّي هِيَ مَاتِتْ. ‏54 شَدْ الطُّفْلَة مِنْ يِدّْهَا وْقَالِلْهَا: «يَا بْنَيَّة قُومْ!» ‏55 يَاخِي رَجْعِتْ فِيهَا الرُّوحْ وْقَامِتْ بِالوَقْتْ وِأْمَرْ بَاشْ يَعْطِيوْهَا تَاكُلْ. ‏56 يَاخِي وَالْدِيهَا بْقَاوْ مِتْعَجّْبِينْ وْوَصَّاهُمْ بَاشْ مَا يْقُولُوا لْحَتَّى حَدْ عَلِّي صَارْ.