إِنْجِيلْ مَتَّى 23

يَسُوعْ يْنَبِّهْ مِنْ الكُتَّابْ مْتَاعْ اليْهُودْ وِالفَرِّيسِيِّينْ

(مَرْقُسْ 12‏:38‏-40؛ لُوقَا 11‏:37‏-52؛ 20‏:45‏-47)

‏1 وِمْبَاعِدْ قَالْ يَسُوعْ لِلنَّاسْ وْلِتْلاَمِذْتُو: ‏2 «الكُتَّابْ مْتَاعْ اليْهُودْ وِالفَرِّيسِيِّينْ قَاعْدِينْ عْلَى الكُرْسِي مْتَاعْ مُوسَى، ‏3 إِمَّالاَ أَعْمْلُوا وْأَحْفْظُوا كُلْ حَاجَة يْقُولُولْكُمْ عْلِيهَا. آمَا مَا تَعْمْلُوشْ كِيفْ مَا يَعْمْلُوا هُومَا، عْلَى خَاطِرْهُمْ يْقُولُوا وْمَا يَعْمْلُوشْ: ‏4 يْحُطُّوا فِي حِمْلْ رْزِينْ عْلَى كْتَافْ النَّاسْ، آمَا هُومَا مَا يْمِسُّوهِشْ بِصْبُعْهُمْ. ‏5 يَعْمْلُوا الحَاجَاتْ الكُلْ بَاشْ تْشُوفْهُمْ النَّاسْ، يْكَبّْرُوا فِي عْمَايِمْهُمْ وِيْطَوّْلُوا فِي ثْرَابِلْ لِبْسِتْهُمْ، ‏6 وِيْحِبُّوا يُقْعْدُوا فِي البْقَايِعْ الأُولَى فِي السَّهْرِيَّاتْ وِالكْرَاسِي الأُولَى فِي المَجَامِعْ ‏7 وِيْحِبُّوا النَّاسْ يْسَلْمُوا عْلِيهُمْ فِي الأَسْوَاقْ، وِيْنَادُولْهُمْ: "يَا مُعَلّْمِينْ" ‏8 آمَا إِنْتُومَا مَا تْخَلِّيوْشْ حَتَّى حَدْ يْنَادِيلْكُمْ: "يَا مُعَلّْمِينْ"، عْلَى خَاطِرْكُمْ الكُلْكُمْ إِخْوَة وْعِنْدْكُمْ مُعَلِّمْ وَاحِدْ. ‏9 وْمَا تْقُولُوشْ لْحَتَّى وَاحِدْ فِي الأَرْضْ "يَا بُونَا"، عْلَى خَاطِرْ عِنْدْكُمْ بُو وَاحِدْ الِّي هُوَ فِي السْمَاءْ. ‏10 وْمَا تْخَلِّيوْشْ حَتَّى وَاحِدْ يْقُلْكُمْ: "يَا سْيَادِي" عْلَى خَاطِرْ عِنْدْكُمْ سِيدْ وَاحِدْ الِّي هُوَ المَسِيحْ. ‏11 وْخَلِّي كْبِيرْكُمْ يِخْدِمْكُمْ ‏12 الِّي يْطَلِّعْ مِنْ رُوحُو يَهْبِطْ، وِلِّي يِتْوَاضِعْ يِتْرْفَعْ.

‏13 آمَا يَا وِيلْكُمْ يَا الكُتَّابْ مْتَاعْ اليْهُودْ وْيَا الفَرِّيسِيِّينْ المُنَافْقِينْ! تْسَكّْرُوا فِي مَمْلِكْةْ السْمَاوَاتْ فِي وْجُوهْ العْبَادْ، لاَ دْخَلْتُوا وْلاَ خَلِّيتُوا الدَّاخْلِينْ يُدْخْلُوا. ‏14 

‏15 يَا وِيلْكُمْ يَا الكُتَّابْ مْتَاعْ اليْهُودْ وْيَا الفَرِّيسِيِّينْ المُنَافْقِينْ! تْشُقُّوا البَرْ وِالبْحَرْ بَاشْ ادَّخْلُوا وَاحِدْ لْدِينْكُمْ، وْكِيُدْخُلْ، تْرُدُّوهْ مِسْتَاهِلْ جْهَنِّمْ قَدّْكُمْ مَرّْتِينْ!

‏16 يَا وِيلْكُمْ يَا شْيُوخْ يَا عِمْيَانْ! الِّي تْقُولُوا: "الِّي يِحْلِفْ بِالهَيْكِلْ مُوشْ مَلْزُومْ بِيْمِينُو، آمَا الِّي يِحْلِفْ بِالذْهَبْ مْتَاعْ الهَيْكِلْ رَاهُو مَلْزُومْ بِيْمِينُو." ‏17 آنَا هُو الِّي عَنْدُو قِيمَة أَكْثِرْ، يَا جُهَّالْ وْيَا عِمْيَانْ؟ الذْهَبْ وِلاَّ الهَيْكِلْ الِّي رَدْ الذْهَبْ مُقَدَّسْ؟ ‏18 وِتْقُولُوا: "الِّي يِحْلِفْ بِالمَذْبَحْ مُوشْ مَلْزُومْ بْحَتَّى شَيْء، آمَا الِّي يِحْلِفْ بِالقُرْبَانْ الِّي فُوقْ المَذْبِحْ رَاهُو مَلْزُومْ بِيْمِينُو." ‏19 آنَا هُو الِّي عَنْدُو قِيمَة أَكْثِرْ، يَا عِمْيَانْ؟ القُرْبَانْ وِلاَّ المَذْبَحْ الِّي يْرُدْ القُرْبَانْ مُقَدَّسْ؟ ‏20 إِمَّالاَ الِّي يِحْلِفْ بِالمَذْبَحْ رَاهُو حْلِفْ بِيهْ وبِالشَّيْء الِّي فُوقُو الكُلُّو! ‏21 وِلِّي يِحْلِفْ بِالهَيْكِلْ رَاهُو يِحْلِفْ بِيهْ وْبِلِّي سَاكِنْ فِيهْ، ‏22 وِلِّي يِحْلِفْ بِالسْمَاءْ يِحْلِفْ بِالعَرْشْ وبِالله الِّي قَاعِدْ عْلِيهْ.

‏23 يَا وِيلْكُمْ يَا الكُتَّابْ مْتَاعْ اليْهُودْ وْيَا الفَرِّيسِيِّينْ المُنَافْقِينْ! تَعْطِيوْ العْشُرْ مْتَاعْ النِّعْنَاعْ وِالشِّبْتْ وِالكَمُّونْ، وْهَمِّلْتُوا أَهَمْ الحَاجَاتْ الِّي فِي الشَّرِيعَة الِّي هُومَا العَدْلْ، الرَّحْمَة وِالإِيمَانْ، كَانْ لاَزِمْ عْلِيكُمْ تَعْمْلُوا هَاذُومَا وْمَا تْخَلِّيوْشْ آذُوكُمْ. ‏24 يَلِّي تْقُودُوا فِي النَّاسْ يَا عِمْيَانْ! تْصَفُّوا المَاء مِالنَّامُوسَة وْتَبْلْعُوا الجْمَلْ.

‏25 يَا وِيلْكُمْ يَا الكُتَّابْ مْتَاعْ اليْهُودْ وْيَا الفَرِّيسِيِّينْ المُنَافْقِينْ! تَغْسْلُوا الكَاسْ وِالصْحَنْ مِنْ بَرَّا، وْمِنْ دَاخِلْ مِلْيَانِينْ بِالخَطْفَة وِالطْمَعْ. ‏26 يَا الفَرِّيسِي يَا أَعْمَى! إِغْسِلْ فِي الأُوِّلْ الكَاسْ وِالصْحَنْ مِنْ دَاخِلْ بَاشْ مِنْ بَرَّا زَادَا يْكُونْ نْظِيفْ.

‏27 يَا وِيلْكُمْ يَا الكُتَّابْ مْتَاعْ اليْهُودْ وْيَا الفَرِّيسِيِّينْ المُنَافْقِينْ! كِيفْ القْبُورْ الِّي مَدْهُونَة بِالأَبْيِضْ، الِّي مِنْ بَرَّة تْبَانْ مِزْيَانَة آمَا مِنْ دَاخِلْ مِلْيَانَة بِعْظَامْ المُوتَى وِالحَاجَاتْ المَنْزُوسَة الكُلْهَا. ‏28 وْإِنْتُومَا زَادَا، مِنْ بَرَّة تُظْهْرُوا لِلنَّاسْ أَبْرَارْ وْمِنْ دَاخِلْ مِلْيَانِينْ بِالنِّفَاقْ وِالشَّرْ.

‏29 يَا الكُتَّابْ مْتَاعْ اليْهُودْ وْيَا الفَرِّيسِيِّينْ المُنَافْقِينْ! تِبْنِيوْ فِي قْبُورْ الأَنْبِيَاءْ وِتْزَيّْنُوا فِي القْبُبْ مْتَاعْ الوِلْيَا الأَبْرَارْ، ‏30 وِتْقُولُوا: "كَانْ جِينَا مُوجُودِينْ فِي وَقْتْ جْدُودْنَا، تَالِي رَانَا مَا شَارِكْنَاهُمْشْ فِي قَتْلاَنْ الأَنْبِيَاءْ." ‏31 هَاكُمْ تِشْهْدُوا عْلَى رْوَاحْكُمْ الِّي إِنْتُومَا وْلاَدْ الِّي قَتْلُوا الأَنْبِيَاءْ. ‏32 إِمَّالاَ إِنْتُومَا وَفُّوا المِيزَانْ مْتَاعْ جْدُودْكُمْ ‏33 يَا وْلاَدْ اللْفَاعِي، كِيفَاشْ بَاشْ تُهْرْبُوا مِنْ الحُكْمْ مْتَاعْ عْذَابْ جْهَنِّمْ ‏34 هَاذَاكَا عْلاَشْ آنَا نَبْعْثِلْكُمْ أَنْبِيَاءْ وْنَاسْ حُكَمَاءْ وْكُتَّابْ، ثَمَّة شْكُونْ مِنْهُمْ الِّي بَاشْ تُقْتْلُوهُمْ وْتُصْلْبُوهُمْ، وْثَمَّة شْكُونْ مِنْهُمْ الِّي بَاشْ تَضْرْبُوهُمْ بِالسُّوطْ فِي المَجَامِعْ مْتَاعْكُمْ وِتْحَاوْزُوهُمْ مِنْ مْدِينَة لِمْدِينَة، ‏35 بَاشْ يْجِي عْلِيكُمْ كُلْ دَمْ طَاهِرْ جْرَى عْلَى الأَرْضْ، مِنْ دَمْ هَابِيلْ البَرِيءْ لْدَمْ زَكَرِيَّا وِلْدْ بَرَخِيَّا الِّي قْتَلْتُوهْ مَا بِينْ الهَيْكِلْ وِالمَذْبَحْ. ‏36 نْقُلْكُمْ الحَقْ: الحَاجَاتْ الخَايْبِينْ هَاذُومَا الكُلْهُمْ بَاشْ يْجِيوْ عْلَى الجِيلْ هَاذَا!»

مْحَبِّةْ يَسُوعْ لْأُورْشَلِيمْ

(لُوقَا 13‏:34‏-35)

‏37 «يَا أُورْشَلِيمْ، يَا أُورْشَلِيمْ، يَلِّي تُقْتُلْ فِي الأَنْبِيَاءْ وْتُرْجُمْ فِي المَبْعُوثِينْ لِيهَا، قَدَّاشْ مِنْ مَرَّة حَبِّيتْ نْلِمْ وْلاَدِكْ مْعَ بْعَضْهُمْ كِيفْ مَا الدْجَاجَة تْلِمْ الفْلاَلِسْ مْتَاعْهَا تَحْتْ جْوَانِحْهَا. آمَا إِنْتُومَا مَا حَبِّيتُوشْ ‏38 هَايْ دَارْكُمْ بَاشْ تَبْقَالْكُمْ خِرْبَة. ‏39 رَانِي نْقُلْكُمْ: مَا عَادِشْ بَاشْ تْشُوفُونِي حَتَّى لِينْ يْجِي الوَقْتْ الِّي تْقُولُوا فِيهْ: "مُبَارَكْ الِّي جَايْ بْإِسْمْ الرَّبْ!"»