إِنْجِيلْ مَتَّى 15

العْوَايِدْ مْتَاعْ الجْدُودْ

(مَرْقُسْ 7‏:1‏-13)

‏1 وْجَاوْ الفَرِّيسِيِّينْ وِالكُتَّابْ مْتَاعْ اليْهُودْ لْيَسُوعْ مِنْ أُورْشَلِيمْ، وْقَالُوا: ‏2 «عْلاَشْ تْلاَمِذْتِكْ مَا يِحْتَرْمُوشْ العْوَايِدْ مْتَاعْ الشْيُوخْ؟ وْمَا يَغْسْلُوشْ يْدِيهُمْ وَقْتِلِّي يَاكْلُوا؟» ‏3 جَاوِبْهُمْ: «وِعْلاَشْ إِنْتُومَا مَا اطِّيعُوشْ وْصِيِّةْ اللهْ وْشَادِّينْ صْحِيحْ فِي عْوَايِدْكُمْ؟ ‏4 رَاهُو اللهْ قَالْ: "إِكْرِمْ بُوكْ وْأُمِّكْ، وِلِّي يْسِبْ بُوهْ وِلاَّ أُمُّو يِلْزْمُو يْمُوتْ." ‏5 آمَا إِنْتُومَا تْقُولُوا إِذَا وَاحِدْ يْقُولْ لْبُوهْ وِلاَّ أُمُّو: "الِّي كُنْتْ نْعَاوِنْ فِيكْ بِيهْ رَانِي عْطِيتُو للهْ، مُوشْ لاَزِمْ عْلِيهْ بَاشْ يِكْرِمْ بُوهْ." ‏6 وْهَكَّا رَدِّيتُوا كِلْمِةْ اللهْ بَاطْلَة بِالعْوَايِدْ مْتَاعْكُمْ. ‏7 يَا مُنَافْقِينْ، صْدَقْ إِشَعْيَاءْ وَقْتِلِّي تْنَبَّأْ وْقَالْ عْلِيكُمْ:

‏8 الشَّعْبْ هَاذَا بْفُمُّو يِكْرِمْ فيَّ

وْقَلْبُو بْعِيدْ عْلِيَّ.

‏9 بَاطِلْ يِعْبْدُوا فِيَّ

وِيْعَلّْمُوا فِي وْصَايَا النَّاسْ.»

شْنُوَّة الِّي يْنَجِّسْ الإِنْسَانْ

(مَرْقُسْ 7‏:14‏-23)

‏10 وْنَادَى يَسُوعْ النَّاسْ وْقَالِلْهُمْ: «اسْمْعُوا وْإِفْهْمُوا ‏11 مُوشْ الِّي يُدْخُلْ لِلفُمْ هُوَ الِّي يْنَجِّسْ الإِنْسَانْ، آمَا رَاهُو الِّي يُخْرُجْ مِالفُمْ هُوَ الِّي يْنَجِّسْ الإِنْسَانْ.» ‏12 وْجَاوْ تْلاَمِذْتُو وْقَالُولُو: «يَاخِي تَعْرِفْ الِّي الفَرِّيسِيِّينْ تْغَشَشُوا كِسَمْعُوا الكْلاَمْ هَاذَا؟» ‏13 جَاوِبْهُمْ: «كُلْ شَجْرَة مَا غْرِسْهَاشْ بُويَا الِّي فِي السْمَاءْ بَاشْ تِتْقَلِّعْ. ‏14 إِبْعْدُوا عْلِيهُمْ! رَاهُمْ عِمْيَانْ يْقُودُوا فِي عِمْيَانْ. وْإِذَا كَانْ رَاجِلْ أَعْمَى يْقُودْ رَاجِلْ أَعْمَى رَاهُمْ لِثْنِينْ يْطِيحُوا فِي حُفْرَة.»

‏15 آمَا بُطْرُسْ قَالُّو: «فَسّْرِلْنَا المَثَلْ هَاذَا.» ‏16 وْقَالْ يَسُوعْ: «يَاخِي لْتَوْ مَازِلْتُوا مَا تِفْهْمُوشْ؟ ‏17 يَاخِي مَا كُمْشْ تْشُوفُوا الِّي أَيْ حَاجَة تُدْخُلْ فِي الفُمْ تِمْشِي لِلكِرْشْ، وِمْبَاعِدْ تُخْرُجْ مِالبْدَنْ؟ ‏18 آمَا الحَاجَة الِّي تُخْرُجْ مِالفُمْ، تْجِي مِالقَلْبْ، وْهَاذَا الِّي يْنَجِّسْ الإِنْسَانْ. ‏19 مِالقَلْبْ تْجِي الأَفْكَارْ الشِّرِّيرَة وِالقَتْلْ وِالزْنَى وِالفْسَادْ وِالسِّرْقَة وِشْهَادِةْ الزُّورْ وِالكُفْرْ، ‏20 هَاذُومَا هُومَا الِّي يْنَجّْسُوا الإِنْسَانْ. آمَا المَاكْلَة بِيْدِينْ مَا هِيشْ مَغْسُولَة مَا تْنَجِّسْشْ الإِنْسَانْ.»

الإِيمَانْ مْتَاعْ المْرَا الكَنْعَانِيَّة

(مَرْقُسْ 7‏:24‏-30)

‏21 وِمْشَى يَسُوعْ مِالبْلاَصَة هَاذِيكَا وْجَا لْشِيرِةْ صُورْ وْصَيْدَا. ‏22 وِالغَادِي جَاتْ مْرَا كَنْعَانِيَّة مِالمَنْطْقَة هَاذِيكَا وْصَاحِتْ: «يَا سِيدِي، يَا وِلْدْ دَاوُدْ، ارْحِمْنِي! بِنْتِي سَاكِنْهَا شِيطَانْ، وِيْعَذِّبْ فِيهَا بَرْشَة.» ‏23 آمَا هُوَ مَا جَاوِبْهَا بْحَتَّى كِلْمَة. وْجَاوْ تْلاَمِذْتُو وِتْشَحّْتُوهْ وْقَالُوا: «أَعْطِيهَا الِّي تْحِبْ عْلِيهْ خَلِّيهَا تِبْعِدْنَا، رَاهِي تِمْشِي وْرَانَا وِتْصِيحْ!» ‏24 جَاوِبْ يَسُوعْ: «آنَا مَا تِبْعَثْتْ كَانْ لِلغْنَمْ الضَّايْعَة مْتَاعْ بِيتْ إِسْرَائِيلْ.» ‏25 آمَا هِيَ جَاتْ وْهَبْطِتْ عْلَى رْكَايِبْهَا قُدَّامُو وْقَالِتْ: «يَا سِيدِي، عَاوِنِّي!» ‏26 وْجَاوِبْهَا: «مُوشْ بَاهِي نَاخْذُوا الخُبْزْ مْتَاعْ الوْلاَدْ وْنَرْمِيوْهْ لِلكْلاَبْ.» ‏27 قَالِتْ: «إِي نْعَمْ، يَا سِيدِي! حَتَّى الكْلاَبْ تَاكُلْ مِالفِتْفَاتْ الِّي يْطِيحْ مِنْ الطَّاوْلَة مْتَاعْ مُولاَهَا.» ‏28 جَاوِبْهَا يَسُوعْ: «يَا مْرَا، إِيمَانِكْ عْظِيمْ! خَلِّي يِتْعْمَلِّكْ الشَّيْء الِّي تْحِبْ عْلِيهْ.» وْبِالوَقْتْ بْنِتْهَا تِشْفَاتْ.

يَسُوعْ يِشْفِي بَرْشَة نَاسْ

‏29 وِمْشَى يَسُوعْ مِنْ غَادِي وِتْعَدَّى عْلَى الشَّطْ مْتَاعْ بُحَيْرِةْ الجَلِيلْ، وِطْلَعْ فُوقْ الجْبَلْ وِقْعَدْ الغَادِي. ‏30 وْجَاوْهْ بَرْشَة نَاسْ وْجَابُوا مْعَاهُمْ نَاسْ مَشْلُولِينْ وْعِيَّابْ وْعِمْيْ وِبْكَاكِشْ وْبَرْشَة أُخْرِينْ، وْحَطُّوهُمْ قُدَّامْ سَاقِيهْ وْهُوَ شْفَاهُمْ. ‏31 وِتْعَجّْبُوا النَّاسْ كِشَافُوا البْكَاكِشْ يِتْكَلّْمُوا، وِالعِيَّابْ يِتْشْفَاوْ، وِالمَشْلُولِينْ يِمْشِيوْ، وِالعِمْيَانْ يْشُوفُوا. وْمَجّْدُوا إِلاَهْ إِسْرَائِيلْ.

يَسُوعْ يْوَكِّلْ أَرْبْعَة آلاَفْ رَاجِلْ

(مَرْقُسْ 8‏:1‏-10)

‏32 وْنَادَى يَسُوعْ تْلاَمِذْتُو وْقَالِلْهُمْ: «رَاهُمْ النَّاسْ غَايْضِينِّي، عْلَى خَاطِرْهُمْ بْقَاوْ مْعَايَا ثْلاَثَة أَيَّامْ مِنْ غِيرْ مَاكْلَة. وْمَا نْحِبِّشْ نَبْعِثْهُمْ يْرَوّْحُوا وْهُومَا جْوَاعَا بَاشْ مَا يْدُوخُوشْ فِي الثْنِيَّة.» ‏33 وْقَالُولُو التْلاَمْذَة: «مْنِينْ بَاشْ نْجِيبُوا خُبْزْ فِي الخْلاَء هَاذَا يِكْفِي النَّاسْ هَاذُومَا الكُلْهُمْ؟» ‏34 وْقَالِلْهُمْ يَسُوعْ: «قَدَّاشْ عِنْدْكُمْ مِنْ خُبْزَة؟» قَالُوا: «سَبْعَة خُبْزَاتْ وْكَعْبَاتْ حُوتْ صْغَارْ.»

‏35 وِأْمَرْ يَسُوعْ النَّاسْ بَاشْ يُقْعْدُوا عْلَى الأَرْضْ، ‏36 وِخْذَا السَّبْعَة خُبْزَاتْ وْكَعْبَاتْ الحُوتْ، وْشْكَرْ اللهْ وِقْسِمْهُمْ وِعْطَاهُمْ لِلتْلاَمْذَة، وِالتْلاَمْذَة عْطَاوْهُمْ لِلنَّاسْ. ‏37 وِالكُلْهُمْ كْلاَوْ لِينْ شَبْعُوا، وْهَزُّوا الِّي فْضُلْ سَبْعَة قْفَافْ كْبَارْ مِلْيَانِينْ. ‏38 الِّي كْلاَوْ كَانُوا أَرْبْعَة آلاَفْ رَاجِلْ، بِخْلاَفْ النْسَاء وِالصْغَارْ. ‏39 وْبَعْدْ مَا بْعَثْ النَّاسْ رَوّْحُوا طْلَعْ فِي الفْلُوكَة وِمْشَى لْمَنْطِقْةْ مَجْدَلْ.