إِنْجِيلْ مَتَّى
أَصْلْ يَسُوعْ المَسِيحْ
(لُوقَا 3:23-38)
1
1 هَاذَا أَصْلْ عَايِلْةْ يَسُوعْ المَسِيحْ وِلْدْ دَاوُدْ وِلْدْ إِبْرَاهِيمْ:2 إِبْرَاهِيمْ جَابْ إِسْحَاقْ. وْإِسْحَاقْ جَابْ يَعْقُوبْ. وْيَعْقُوبْ جَابْ يَهُوذَا وْإِخْوْتُو. 3 وْيَهُوذَا جَابْ فَارِصْ وْزَارَحْ مِنْ ثَامَارْ. وْفَارِصْ جَابْ حَصْرُونْ. وْحَصْرُونْ جَابْ أَرَامْ. 4 وْأَرَامْ جَابْ عَمِّينَادَابْ. وْعَمِّينَادَابْ جَابْ نَحْشُونْ. وْنَحْشُونْ جَابْ سَلْمُونْ. 5 وْسَلْمُونْ جَابْ بُوعَزْ مِنْ رَاحَابْ. وْبُوعَزْ جَابْ عُوبِيدْ مِنْ رَاعُوثْ. وْعُوبِيدْ جَابْ يَسَّى. 6 وْيَسَّى جَابْ المَلِكْ دَاوُدْ.
بَعْدْ هَاذَا دَاوُدْ جَابْ سُلَيْمَانْ مِنْ المْرَا الِّي كَانْ مَاخِذْهَا أُورِيَّا. 7 وْسُلَيْمَانْ جَابْ رَحُبْعَامْ. وْرَحُبْعَامْ جَابْ أَبِيَّا. وْأَبِيَّا جَابْ آسَا. 8 وْآسَا جَابْ يَهُوشَافَاطْ. وْيَهُوشَافَاطْ جَابْ يُورَامْ. وْيُورَامْ جَابْ عُزِّيَّا. 9 وْعُزِّيَّا جَابْ يُوثَامْ. وْيُوثَامْ جَابْ أَحَازْ. وْأَحَازْ جَابْ حِزْقِيَّا. 10 وْحِزْقِيَّا جَابْ مَنَسَّى. وْمَنَسَّى جَابْ آمُونْ. وْآمُونْ جَابْ يُوشِيَّا. 11 وْيُوشِيَّا جَابْ يَكُنْيَا وْإِخْوْتُو وَقْتِلِّي كَانُوا اليْهُودْ مَنْفِيِّينْ فِي بَابِلْ.
12 وْبَعْدْ مَا وْفَاتْ مُدِّةْ النَّفْيْ مْتَاعْهُمْ فِي بَابِلْ، يَكُنْيَا جَابْ شَأَلْتِئِيلْ. وْشَأَلْتِئِيلْ جَابْ زَرُبَّابِلْ. 13 وْزَرُبَّابِلْ جَابْ أَبِيهُودْ. وْأَبِيهُودْ جَابْ أَلِيَاقِيمْ. وْأَلِيَاقِيمْ جَابْ عَازُورْ. 14 وْعَازُورْ جَابْ صَادُوقْ. وْصَادُوقْ جَابْ أَخِيمْ. وْأَخِيمْ جَابْ أَلِيُودْ. 15 وْأَلِيُودْ جَابْ أَلِيعَازَرْ. وْأَلِيعَازَرْ جَابْ مَتَّانْ. وْمَتَّانْ جَابْ يَعْقُوبْ. 16 وْيَعْقُوبْ جَابْ يُوسُفْ رَاجِلْ مَرْيَمْ الِّي جَابِتْ يَسُوعْ الِّي يْسَمِّيوْهْ المَسِيحْ.
17 وْهَكَّا نَلْقَاوْ أَرْبَعْطَاشِنْ جِيلْ مِنْ إِبْرَاهِيمْ حَتَّى لْدَاوُدْ، وْأَرْبَعْطَاشِنْ جِيلْ مِنْ دَاوُدْ لِينْ تِنْفَاوْ اليْهُودْ فِي بَابِلْ، وْأَرْبَعْطَاشِنْ جِيلْ مِلِّي وْفَاتْ مُدِّةْ النَّفْيْ مْتَاعْهُمْ فِي بَابِلْ حَتَّى لِينْ جَا المَسِيحْ.
وْلَادِةْ يَسُوعْ المَسِيحْ
(لُوقَا 2:1-7)
18 وْهَاوْ كِيفَاشْ تُولِدْ يَسُوعْ المَسِيحْ: وَقْتِلِّي كَانِتْ مَرْيَمْ أُمُّو مَخْطُوبَة لْرَاجِلْ إِسْمُو يُوسُفْ، وِقْبَلْ مَا يْعَرّْسُوا، حِبْلِتْ بْقُوِّةْ الرُّوحْ القُدُسْ. 19 يَاخِي قَرِّرْ يُوسُفْ خَطِيبْهَا بَاشْ يِبْعِدْ عْلِيهَا مِنْ غِيرْ مَا يَفْضِحْهَا، عْلَى خَاطْرُو كَانْ رَاجِلْ يْخَافْ رَبِّي.
20 وْهُوَ مَازَالْ يِخَمِّمْ فِي الحْكَايَة، ظْهُرْلُو مَلاَكْ مِنْ عِنْدْ رَبِّي فِي المْنَامْ، وْقَالُّو: «يَا يُوسُفْ وِلْدْ دَاوُدْ، مَا تْخَافِشْ بَاشْ تْعَرِّسْ بْمَرْيَمْ. رَاهِي حِبْلَى بْقُوِّةْ الرُّوحْ القُدُسْ، 21 وْبِشْ تْجِيبْ طْفُلْ، إِنْتِ تْسَمِّيهْ يَسُوعْ، عْلَى خَاطْرُو بَاشْ يْخَلِّصْ شَعْبُو مِنْ ذْنُوبْهُمْ.»
22 وْهَاذَا الكُلْ صَارْ بَاشْ يْتِمْ الكْلاَمْ الِّي قَالُو رَبِّي عْلَى لْسَانْ النَّبِي الِّي قَالْ:
23 الصْبِيَّة تِحْبِلْ، وِتْجِيبْ طْفُلْ،
يِتْسَمَّى «عِمَّانُوئِيلْ!» (وْمَعْنَاهَا رَبِّي مْعَانَا)