Yesus tu jalang yang batul
14:1-14
14
1 Yesus bilang par Antua pung murid-murid lai kata, “Jang hati susa. Parcaya Allah tarus deng parcaya Beta tarus lai. 2 Di Beta pung Bapa pung ruma ada banya kamar. Kalo itu seng batul, Beta seng bilang akang par kamong. Beta pi ka sana kamuka par kasi siap tampa par kamong. 3 Abis pi kasi siap tampa tu, Beta nanti bale kombali la bawa kamong ka sana. Beta biking bagitu biar kalo Beta ada di mana, kamong jua ada di situ lai. 4 Kamong su tau jalang ka tampa yang Beta mau pi tu.”5 La Tomas bilang par Antua kata, “Tuhan! Katong sa balong tau Tuhan mau pi ka mana. Bagemana kong katong bisa tau jalang ka sana?”
6 Yesus bilang par dia, “Beta ni jalang yang batul par pi par Beta pung Bapa. Lewat Beta, manusia bisa batul-batul tau soal Allah deng bisa hidop tarus-tarus deng Antua. Seng ada satu orang lai yang bisa pi par Beta pung Bapa kalo seng lewat Beta. 7 Kalo kamong su kanal Beta, itu pung arti kamong jua su kanal Beta pung Bapa lai. Jadi dari sakarang ni, kamong su kanal Antua deng su lia Antua.”
8 La Filipus bilang par Yesus kata, “Tuhan! Kalo bagitu, tolong kasi unju Tuhan pung Bapa tu par katong. Itu sa yang katong mau.”
9 Mar Yesus bilang par dia, “Filipus e! Masa katong su sama-sama bagini lama, mar ale balong kanal Beta? Sapa yang su lia Beta, itu sama sa deng dia jua su lia Beta pung Bapa lai. Jadi, bagemana kong ale bisa bilang kata coba kasi unju Beta pung Bapa tu par kamong? 10 Jang sampe ale seng parcaya kalo Beta deng Beta pung Bapa tu satu kapa? Apa yang Beta ajar par kamong tu bukang dari Beta pung diri sandiri, mar dari Beta pung Bapa yang satu deng Beta tu. Mala, Antua yang biking Antua pung karja tu. 11 Kamong musti parcaya kalo Beta deng Beta pung Bapa tu satu. Mar kalo seng, paleng kurang kamong musti parcaya Beta tagal tanda-tanda herang yang Beta biking tu. 12 Dengar bae-bae tagal apa yang Beta bilang ni batul! Sapa sa yang parcaya Beta, dia nanti biking apa sa yang Beta parna biking. Mala dia nanti biking yang labe hebat lai dari apa yang Beta biking, tagal sakarang ni Beta mau pi par Beta pung Bapa. 13 Jadi, apa sa yang kamong minta dari Beta pung Bapa deng Beta pung nama, Beta nanti biking akang. Deng bagitu, orang-orang nanti taru hormat par Beta pung Bapa, tagal apa yang Beta biking tu. 14 Jadi satu kali lai, apa sa yang kamong minta dari Tuhan Allah deng Beta pung nama, Beta nanti biking akang.”
Tuhan pung Roh nanti datang par tolong orang-orang parcaya
14:15-31
15 Yesus bilang par Antua pung murid-murid lai kata, “Kalo kamong sayang Beta, kamong pasti iko Beta pung parenta-parenta. 16 La Beta nanti minta Beta pung Bapa par kasi Antua pung Roh par tolong kamong ganti Beta. Roh tu nanti tinggal sama-sama deng kamong tarus-tarus. 17 Roh tu nanti biking kamong mangarti Allah pung ajarang yang batul. Orang-orang yang hidop iko dunya ni pung mau, dong seng mau tarima Roh tu, tagal dong seng lia deng seng kanal Roh tu. Mar kamong kanal Roh tu, tagal Roh tu ada sama-sama deng kamong tarus deng nanti tinggal dalang kamong pung hati.
18 Beta pasti seng kasi tinggal kamong sandiri macang deng anana piatu. Beta nanti bale kombali par kamong. 19 Tinggal sadiki tempo sa la orang-orang yang hidop iko dunya pung mau nanti seng lia Beta lai. Mar kamong, kamong nanti lia Beta. La tagal Beta nanti hidop kombali, kamong jua nanti hidop kombali lai. 20 Kalo Beta su hidop kombali, baru kamong tau kalo Beta deng Beta pung Bapa tu satu, la kamong deng Beta tu jua satu lai. 21 Sapa yang tarima la iko Beta pung parenta, dia tu sayang Beta. La sapa yang sayang Beta, Beta pung Bapa nanti sayang dia lai, la Beta jua nanti sayang dia deng kasi unju Beta ni sapa par dia.”
22 Di situ ada satu orang yang nama Yudas. Mar dia tu bukang Yudas Iskariot. Waktu dia dengar Yesus bilang bagitu, dia tanya Antua kata, “Tuhan, mangapa kong Tuhan mau kasi unju Tuhan tu sapa cuma par katong sa, bukang par samua orang di dunya ni lai?”
23 Yesus jawab dia, “Sapa yang sayang Beta, dia pasti iko Beta pung ajarang. Beta pung Bapa nanti sayang dia la Beta deng Beta pung Bapa nanti datang tinggal sama-sama deng dia. 24 Sapa yang seng sayang Beta, dia pasti seng iko Beta pung ajarang. Samua yang Beta ajar par kamong tu bukang dari Beta sandiri, mar dari Beta pung Bapa yang utus Beta.
25 Sakarang, Beta masi ada sama-sama deng kamong, jadi Beta bilang samua ni par kamong sakali. 26 Mar kalo Beta su bale par Beta pung Bapa, Antua nanti kasi Antua pung Roh par ajar samua-samua deng par kasi inga soal samua-samua yang Beta parna ajar par kamong. Barang, Roh tu datang par tolong kamong ganti Beta di dunya ni. 27 Waktu Beta pi, Beta biking kamong pung hati dame. Dame yang Beta kasi tu dame yang sama deng dame yang ada dalang Beta pung hati. Apa yang Beta kasi tu seng sama deng apa yang manusia di dunya ni kasi. Jadi jang susa hati ka taku. 28 Kamong su parna dengar Beta bilang kata Beta mau pi mar nanti Beta bale kombali lai to? Kalo kamong sayang Beta, kamong pung hati pasti sanang tagal Beta pi par Beta pung Bapa. Barang, Beta pung Bapa tu labe basar dari Beta.
29 Sakarang Beta su bilang samua ni sakali biar kalo akang jadi, kamong bisa labe parcaya Beta. 30 Beta seng bisa bicara labe banya lai par kamong, tagal Setang pung Raja yang parenta dunya ni ada datang par serang Beta. Mar dia seng pung kuasa par ator Beta. 31 Mar biar orang-orang di dunya ni bisa tau kalo Beta sayang Beta pung Bapa, Beta biking Beta pung Bapa pung parenta.
Badiri jua! Mari katong pi dari sini!”