Yesus bicara deng Nikodemus
3:1-21
3
1 Satu kali bagini, ada satu orang dari kalompok Farisi nama Nikodemus. Dia tu satu dari orang Yahudi pung pamimping-pamimping. 2 Dia datang malang-malang par Yesus la bilang kata, “Tuang Guru e! Katong tau kalo Allah utus Tuang Guru ni par datang kasi balajar katong. Barang, seng ada satu orang lai yang bisa biking tanda-tanda herang macang yang Tuang Guru biking tu kalo Allah seng tolong dia.”3 La Yesus bilang par dia kata, “Dengar bae-bae tagal apa yang Beta bilang ni batul! Seng ada satu orang lai yang bisa lia Allah pegang parenta jadi Raja kalo dia seng lahir satu kali lai.”
4 La Nikodemus bale tanya Antua kata, “Bapa e! Orang yang su basar bisa lahir satu kali lai tu bagemana? Masa dia musti maso ka dia pung mama pung dalang poro biar dia pung mama bisa kasi lahir dia satu kali lai?”
5 Yesus bilang par dia, “Dengar bae-bae tagal apa yang Beta bilang ni batul! Sapa yang seng lahir satu kali lai dari aer deng dari Allah pung Roh, dia seng bisa lia Allah pegang parenta jadi Raja. 6 Manusia lahir dari manusia, mar manusia pung roh lahir baru dari Allah pung Roh. 7 Jadi, jang herang tagal Beta bilang ale dong musti lahir satu kali lai. 8 Conto macang deng anging. Akang batiop ka mana sa iko akang pung mau sandiri. Katong bisa dengar akang pung suara, mar katong seng tau kata akang datang dari mana ka mau pi ka mana. Bagitu lai deng orang yang lahir dari Allah pung Roh. Katong seng bisa ator Allah pung Roh tu. Katong jua seng bisa mangarti Allah pung Roh pung cara karja. Mar, katong bisa lia Allah pung Roh karja dalang dong pung hidop hari-hari.”
9 La Nikodemus bale bilang par Antua kata, “Ih! Bagemana kong bisa jadi bagitu?”
10 Yesus jawab dia, “Wih, bu! Ale ni orang Israel pung guru yang dong paleng taru hormat to? Masa ale seng mangarti apa yang Beta bilang tu bagemana? 11 Dengar bae-bae tagal apa yang Beta bilang ni batul! Katonga bicara soal apa yang katong su tau. Katong kasi tau apa yang katong su lia deng katong pung mata kapala sandiri. Mar, kamongb seng mau tarima akang. 12 Kalo Beta bilang soal apapa yang jadi di dunya ni sa kamong seng parcaya akang, bagemana kong Beta bilang soal samua yang jadi di sorga lai? Mangkali kamong seng parcaya akang manta-manta. 13 Seng ada satu orang lai di dunya ni yang parna nai ka sorga. Cuma Beta sa yang tau soal samua yang jadi di sorga, tagal Beta ni Ana Manusia. Beta turung dari sorga la bilang soal sorga tu par kamong samua.
14 Dolo waktu di padang gurun, Musa kasi nai ular tambaga satu tinggi-tinggi di atas kayo. Sapa yang dapa gigi dari ular babisa la angka muka nganga ular tambaga tu, dia salamat.* Bagitu lai deng Beta Ana Manusia ni. Satu hari nanti Beta dapa angka tinggi-tinggi,c 15 biar samua orang yang parcaya Beta nanti hidop tarus-tarus deng Allah.
16 Tagal Allah paleng sayang manusia di dunya ni sampe Antua utus Antua pung Ana satu areng-areng ni datang ka dunya par tabus manusia pung dosa-dosa. Antua utus Antua pung Ana ni biar sapa sa yang parcaya Antua pung Ana ni, dia seng mati tarus, mar hidop tarus-tarus deng Antua. 17 Barang, Antua utus Antua pung Ana ni par datang ka dunya, bukang par hukum manusia, mar par kasi salamat manusia dari dong pung dosa-dosa. 18 Sapa sa yang parcaya Allah pung Ana ni, Allah seng hukum dia. Mar sapa sa yang seng parcaya Ana ni, Allah su hukum dia tagal dia seng parcaya Allah pung Ana satu areng-areng ni.
19 Antua pung Ana tu tarang yang su datang ka dunya, mar manusia labe suka hidop dalang galap. Dong seng mau hidop dalang tarang tagal dong biking samua yang jahat tarus. Itu mangapa kong Allah hukum manusia. 20 Sapa sa yang biking apa yang jahat tarus, dia binci tarang tu. Dia seng mau datang par tarang tu, tagal jang sampe orang nanti lia dia pung kajahatang-kajahatang yang dia biking. 21 Mar sapa sa yang biking apa yang batul tarus, dia datang par tarang tu. Dia datang biar samua orang bisa lia kantara-kantara kalo dia ada biking Allah pung mau.”
Yohanis Tukang Baptis bicara soal Yesus
3:22-36
22 Abis bicara deng Nikodemus, Yesus deng Antua pung murid-murid pi ka tampa laeng di propinsi Yudea. Dong tinggal la baptis orang-orang di situ. 23-24 Waktu itu Yohanis balong maso bui.* Jadi, dia jua ada baptis orang di kampong Ainon yang baku dekat deng kampong Salim tagal di situ aer banya. Orang banya datang tarus par dapa baptis dari Yohanis.
25 Satu kali bagini, Yohanis pung murid-murid baku malawang deng orang Yahudi satu soal orang Yahudi pung atorang agama par kasi barsi diri. 26 Tagal itu, dia pung murid-murid tu datang par dia la bilang kata, “Tuang guru e! Masi inga Antua Satu di aer Yordan pung sabala tu ka seng? Tuang guru parna kasi tau soal Antua par katong.* Sakarang ni, Antua ada baptis orang-orang lai la orang-orang paleng banya su pi par Antua.”
27 La Yohanis bilang par dong kata, “E, dengar beta bilang! Orang seng bisa biking apapa kalo Allah di sorga seng buka jalang par dia. 28 Kamong sandiri su dengar beta bilang kalo beta ni bukang Orang yang Allah su Angka par Kasi Salamat Manusia, mar beta ni orang yang dapa utus kamuka par kasi siap jalang par Antua.
29 Conto bagini: Antua tu macang deng panganting laki-laki la orang-orang yang datang par Antua tu macang deng panganting parampuang. Panganting parampuang tu panganting laki-laki pung. Beta ni macang deng panganting laki-laki tu pung tamang bae. Pas hari kaweng, waktu panganting laki-laki tu pung tamang bae badiri dekat panganting laki-laki tu la dengar dia bicara, dia pung hati paleng sanang. Bagitu lai deng beta. Beta rasa paleng sanang paskali waktu dengar samua orang datang par Antua. 30 Antua tu yang musti jadi labe tamba panting, la beta ni musti jadi labe tamba seng panting.
31 Antua tu datang dari sorga, jadi Antua labe hebat dari samua orang di dunya ni. Beta, yang lahir dari beta pung orang tatua di dunya ni, cuma manusia biasa. Beta bicara soal samua yang jadi di dunya. Mar Antua yang datang dari sorga tu, Antua labe hebat dari samua. 32 Antua su kasi tau soal apa yang Antua su lia deng dengar di sorga, mar seng ada satu orang lai yang parcaya apa yang Antua bilang tu. 33 Mar sapa sa yang parcaya apa yang Antua bilang, itu sama sa dia mangaku kalo apa yang Allah bilang tu batul. 34 Barang, Yesus dapa utus dari Allah par kasi tau Allah pung ajarang, tagal Allah kasi Antua pung Roh seng abis-abis par Yesus.
35 Allah Bapa paleng sayang Antua pung Ana tu paskali sampe Antua kasi Antua pung kuasa samua par Antua pung Ana tu. 36 Jadi, sapa yang parcaya Allah pung Ana tu, dia su mulai hidop tarus-tarus deng Allah. Mar sapa yang seng dengar-dengarang Antua pung Ana tu, jang harap kata dia bisa hidop tarus-tarus deng Allah. Mala yang dia dapa tu cuma Allah pung morka tarus-tarus par dia, mulai dari sakarang ni.”