Yesus hidop kombali
24:1-12
24
1 Hari Minggu amper siang, parampuang-parampuang tu pi ka Yesus pung kubur bawa rampa-rampa yang bobou sadap deng minya bobou sadap yang dong su kasi siap par taru di Yesus pung mayat. 2 Pas dong sampe di kubur, dong lia batu basar yang tutu mulu kubur tu su taguling. 3 Tarus dong maso, mar seng lia Tuhan Yesus pung mayat di situ lai. 4 Waktu dong samua ada badiri taherang-herang, skrek bagini ada dua orang badiri dekat dong. Dong dua pung pakiang manyala macang deng kilat. 5 Parampuang-parampuang tu paleng takotang la tikang lutu sampe muka kana tana par taru hormat par dong dua tu. Mar dong dua bilang kata, “Mangapa kong kamong cari orang hidop dalang orang mati pung tampa ni? 6 Antua su seng ada di sini lai! Antua su hidop kombali! Kamong inga ka seng apa yang Antua su parna bilang par kamong waktu Antua masi ada deng kamong di propinsi Galilea tu?* 7 Antua bilang kalo Ana Manusia nanti dapa kasi par orang-orang bardosa, dapa salib, la hidop kombali pas hari katiga.”8 Dengar bagitu, parampuang-parampuang tu dapa inga apa yang Yesus su parna bilang par dong.
9 La waktu dong bale dari kubur, dong carita samua-samua yang su jadi tu par Yesus pung sapulu satu murid deng par Antua pung murid-murid yang laeng lai. 10 Parampuang-parampuang yang bawa kabar par Yesus pung utusang-utusang tu nama Maria Makdalena,a Yohana, Yakobis pung mama Maria, deng parampuang-parampuang laeng lai. 11 Mar, dong seng parcaya parampuang-parampuang tu pung carita. Dong pikir kata parampuang-parampuang tu cuma karang carita yang seng maso akal sa.
12 Mar biar kata bagitu, Petrus langsung badiri la lari ka Yesus pung kubur. Pas sampe di kubur, dia tundu la mangente ka dalang, mar cuma dapa lia kaeng lenan sa. Tarus dia pi tabingong-bingong, tagal dia seng tau apa yang jadi sampe Yesus pung mayat su seng ada di situ lai.
Yesus kasi unju rupa par Antua pung murid dua yang bajalang ka Emaus
24:13-35
13 Hari itu jua, hari Yesus hidop kombali tu, Antua pung murid dua orang pi ka kampong satu. Kampong tu nama Emaus. Kampong tu mangkali barang sapulu satu kilometer dari kota Yerusalem.* 14 Waktu dong dua bajalang, dong baku bicara soal samua-samua yang su jadi par Yesus. 15 Waktu dong dua ada carita deng tukar pikirang bagini, Yesus sandiri datang par dong dua la bajalang sama-sama deng dong. 16 Dong lia Antua, mar macang kata ada apapa yang pele dong pung mata sampe dong seng kanal Antua. 17 Tarus, Yesus bilang par dong dua kata, “Kamong dua bajalang stori apa sakali tu?”
La dong dua barenti. Dong pung muka lia kasiang paskali. 18 Satu dari dong tu nama Kleopas. Dia bilang par Yesus kata, “Dari samua orang yang datang ka Yerusalem, mangkali cuma Bapa ni sa yang seng tau apa yang jadi baru-baru ni!”
19 Antua bilang kata, “Barang ada apa la?”
Dong bilang, “Bapa seng tau apa yang jadi deng Yesus dari Nasaret tu? Antua tu Allah pung juru bicara deng dapa kuasa dari Allah par biking tanda-tanda herang deng par kasi balajar orang-orang. Antua biking Allah pung hati sanang la banya orang taru hormat par Antua. 20 Mar katong pung imam-imam kapala deng pamimping-pamimping su kasi Antua par gubernur par dapa hukum mati la dong su salib Antua. 21 Dolo katong harap kalo Antua tu yang nanti kasi bebas katong bangsa Israel dari bangsa Roma. Labe-labe lai, hari ini ni hari katiga Antua mati.
22 Baru sakarang ni jua ada babarapa parampuang dari katong pung orang-orang su biking takajo katong. Amper siang dong su pi ka kubur, 23 mar seng dapa Antua pung mayat. La dong bale la bilang par katong kalo dong su dapa lia malekat-malekat, la malekat-malekat tu bilang par dong kata Yesus su hidop! 24 Tarus, katong pung tamang-tamang saparu su pi ka kubur tu lai la dapa samua parsis macang deng apa yang parampuang-parampuang tu bilang. Mar dong seng lia Antua.”
25 La Yesus bilang par dong dua tu kata, “He, kamong ni seng mangarti apapa! Mangapa kong kamong susa paskali par parcaya samua yang Allah pung juru-juru bicara dolo-dolo su bilang tu? 26 Orang yang Allah su Angka par Kasi Salamat Manusia tu musti sangsara sampe mati do, baru dapa hormat deng kuasa to?” 27 La Antua mulai kasi jelas par dong dua soal apa yang tatulis dalang Allah pung Tulisang soal Antua pung diri. Antua ajar dong mulai dari kitab-kitab yang Musa su tulis sampe ka kitab-kitab yang Allah pung juru-juru bicara laeng su tulis.
28 Waktu dong su mau sampe ka kampong Emaus, Yesus biking diri macang kata Antua mau bajalang tarus. 29 Mar dong dua minta deng sunggu-sunggu dari Antua kata, “Bapa e! Tinggal deng katong jua, tagal su amper malang ni. Matahari jua su mau maso.” La Antua iko dong la tinggal sama-sama deng dong.
30 Waktu Antua ada dudu makang deng dong dua, Antua ambe roti la minta dangke dari Allah, la pata-pata akang, la kasi akang par dong dua. 31 Oras itu jua, dong dua pung mata tabuka la dong kanal Antua. Mar skrek bagini, Antua ilang dari tenga-tenga dong. 32 La laeng bilang par laeng kata, “Ada haros kong katong pung hati sanang paskali waktu Antua bicara deng katong dua di tenga jalang tadi tu, deng waktu Antua kasi jelas Allah pung Tulisang yang Antua pung juru-juru bicara su tulis!”
33 Seng rekeng satu dua tiga lai, dong dua badiri la bale kombali ka Yerusalem. Di sana, dong baku dapa deng Antua pung sapulu satu murid. Murid-murid tu ada bakumpul deng Antua pung murid-murid yang laeng. 34 Tarus, dong bilang par dong dua kata, “He, batul paskali! Tuhan Yesus su hidop. Antua su kasi unju rupa lai par Simon.”
35 La dong dua carita samua-samua yang jadi di tenga jalang tadi deng bagemana sampe dong bisa kanal Yesus waktu Antua pata-pata roti tadi.*
Yesus kasi unju rupa par Antua pung murid-murid
24:36-49
36 Waktu Yesus pung murid-murid ada bastori soal samua yang jadi tu, skrek bagini, Antua badiri di tenga-tenga dong la bilang, “Syalom par kamong samua!”
37 Dong samua takajo deng takotang, tagal dong kira kata dong ada lia spok. 38 Mar Yesus bilang par dong kata, “Mangapa kong kamong takajo? Apa yang biking sampe kamong seng parcaya kalo Beta su hidop kombali? 39 Coba lia Beta pung tangang deng kaki ni, biar kamong tau kalo ini batul Beta. Raba la lia, Beta ni bukang spok, tagal spok seng ada pung isi deng tulang, mar Beta ada pung.”
40 Waktu Antua ada bicara bagitu, Antua kasi unju Antua pung bakas luka di tangang deng kaki par dong. 41 Dong masi taherang-herang deng talalu sanang sampe amper-amper seng bisa parcaya apa yang dong lia. Tarus Antua tanya dong kata, “Kamong ada pung makanang ka seng?” 42 La dong kasi ikang bakar sapanggal par Antua. 43 Antua ambe akang la makang akang di muka dong samua.
44 Antua bilang par dong kata, “Dolo waktu Beta ada sama-sama deng kamong, Beta su parna bilang par kamong kata, ‘Apa yang tatulis soal Beta dalang Kitab Torat yang Musa su tulis, dalang Allah pung juru-juru bicara pung tulisang, deng dalang Kitab Lagu-Lagu, samua tu musti jadi.’ ”
45 Tarus, Antua buka dong pung pikirang biar dong bisa mangarti Allah pung Tulisang tu. 46 Antua bilang bagini, “Dalang Allah pung Tulisang, Allah pung juru-juru bicara su bicara soal Beta, Orang yang Allah su Angka par Kasi Salamat Manusia ni. Dong bilang kalo Beta musti sangsara sampe mati, mar akang pung tiga hari Beta nanti hidop kombali. 47 Dong jua ada bilang kata deng Beta pung kuasa, Beta pung orang-orang nanti pi kasi tau par samua orang kalo dong musti kasi tinggal dong pung dosa-dosa biar Allah kasi ampong dong. Beta pung orang-orang tu nanti bawa pasáng tu mulai dari Yerusalem sampe ka sagala bangsa di dunya.
48 Kamong sandiri su lia samua hal yang jadi par Beta deng kamong pung mata kapala sandiri. Jadi, kamong musti pi kasi tau akang par samua orang. 49 La Beta nanti utus Allah pung Roh par kamong, sama deng apa yang Beta pung Bapa su parna janji tu.* Mar, kamong musti tinggal di kota ni sampe Roh tu datang la kasi kuasa dari sorga par kamong.”
Yesus nai ka sorga
24:50-53
50 Yesus bawa Antua pung murid-murid ka luar kota Yerusalem, la bajalang sampe ka satu tampa dekat kampong Betania. Sampe di situ, Antua angka tangang la kasi berkat par dong. 51 Waktu Antua ada kasi berkat par dong, Antua tarangka ka sorga la kasi tinggal dong di situ. 52 Dong samua tikang lutu sampe dong pung muka kana tana par somba Antua. Abis itu, dong samua pulang ka Yerusalem deng hati paleng sanang paskali. 53 La sabang hari dong bakumpul di kintal Tampa Sombayang Pusat par puji-puji Allah.*