Orang banya puji-puji Yesus di Yerusalem
11:1-11
11
1 Yesus deng Antua pung murid-murid su amper sampe ka kota Yerusalem. Dong ada dekat kampong Betfage deng kampong Betania yang ada di gunung Saitun. Tarus, Antua suru Antua pung murid dua orang kata, 2 “Kamong dua pi ka kampong yang ada di muka tu! Pas sampe di sana, kamong nanti dapa lia keledai paranggang saekor ada taika. Keledai tu, orang balong parna nai akang. Lapas la bawa akang kamari. 3 Kalo ada orang tanya kata mangapa kong kamong biking bagitu, bilang par dong kalo Tuhan mau pake akang. Abis pake, Antua nanti langsung kasi bale akang ka sini lai.”4 Jadi dong dua pi ka kampong tu la dapa keledai paranggang saekor yang ada taika di muka pintu, di pinggir jalang. La dong lapas akang. 5 Satu dua orang yang ada badiri di situ tanya dong kata, “He, mangapa kong kamong lapas keledai tu?” 6 La dong dua jawab orang-orang tu macang deng apa yang Yesus su bilang par dong. La orang-orang tu kasi biar dong dua pi deng keledai tu.
7 Tarus, dong dua bawa akang par Yesus. Dong alas akang pung balakang deng dong pung baju panjang luar la Antua nai di atas akang. 8 Orang banya jua buka dong pung baju panjang luar la taru di jalang deng ada lai yang taru jaga-jaga pohong palem yang dong ambe dari kabong, biar Yesus bajalang di atas akang, par taru hormat par Antua. 9 La orang-orang yang bajalang di muka deng di balakang Antua bataria kata,
“Hosana!a Mari puji Antua yang datang deng Tuhan pung kuasa ni!*
10 Mari puji Antua yang datang par pegang parenta macang deng katong pung moyang Daud!
Hosana! Mari puji Allah yang pegang parenta di tampa yang paleng tinggi di sorga!”
11 Waktu Yesus deng Antua pung murid-murid sampe di Yerusalem, Antua maso ka orang Yahudi pung Tampa Sombayang Pusat pung kintal la lia apa sa yang jadi di situ. Mar tagal su amper malang, Antua bale kombali ka Betania sama-sama deng Antua pung murid sapulu dua orang tu.
Yesus kutok pohong ara yang seng babua
11:12-14
12 Akang pung eso, Yesus deng Antua pung murid-murid kaluar dari kampong Betania. Waktu dong ada di tenga jalang, Antua rasa lapar. 13 Dari jau Antua lia ada pohong ara satu yang su badaong. Tarus, Antua pi dekat-dekat akang biar mangkali Antua bisa dapa akang pung bua. Mar waktu Antua sampe, Antua seng dapa apapa, cuma daong-daong sa. Barang, waktu itu balong musing babua. 14 La Antua kutok pohong ara tu kata, “Mulai dari oras ni, se seng babua-babua lai, jadi seng satu orang lai yang bisa makang se pung bua!”b Antua pung murid-murid jua dengar apa yang Antua bilang tu.
Yesus user orang-orang bajual di kintal Tampa Sombayang Pusat
11:15-19
15 Waktu Yesus deng Antua pung murid-murid sampe di kota Yerusalem, Antua maso ka kintal Tampa Sombayang Pusat kombali. Waktu Antua sampe, Antua user orang-orang yang ada bajual deng balanja di sana. Antua bula-bale orang-orang yang jaga tukar kepengc pung meja-meja deng orang-orang yang jual burung pombo pung bangku-bangku. 16 Antua jua seng kasi biar orang-orang bawa apapa satu lewat kintal Tampa Sombayang Pusat lai. 17 La Antua ajar dong kata, “Hoe! Kamorang lupa kapa kata dalang Allah pung Tulisang ada bilang, ‘Beta pung ruma ni nanti jadi tampa sombayang par samua bangsa’?* Mar kamorang su biking akang jadi ‘pancuri-pancuri pung tampa basambunyi!’ ”*
18 Waktu orang Yahudi pung imam-imam kapala deng guru-guru Torat dengar apa yang Antua biking tu, dong cari jalang par bunu Antua tagal dong taku Antua. Barang, dong lia orang banya sanang deng taherang-herang dengar Antua pung ajarang.
19 Pas amper malang, Antua deng Antua pung murid-murid kaluar dari Yerusalem tu.
Kalo sombayang musti parcaya sunggu-sunggu
11:20-26
20 Akang pung eso pagi-pagi, Yesus deng Antua pung murid-murid pi ka kota Yerusalem kombali. Waktu dong ada bajalang, dong lia pohong ara yang Antua kutok tu su karing sampe di akar-akar. 21 Petrus langsung dapa inga apa yang jadi kamareng la bilang par Antua kata, “Tuang Guru e, coba lia tu! Pohong ara yang Tuang Guru kutok kamareng tu, akang su karing!”
22 La Antua bilang par dong kata, “Kamong musti parcaya Allah sunggu-sunggu! 23 Dengar bae-bae tagal apa yang Beta bilang ni batul! Sapa sa yang parcaya Allah sunggu-sunggu deng seng bimbang, dia bisa bilang par gunung ni kata, ‘He gunung! Tacabu la talempar ka dalang lautang!’ Allah pasti biking akang par dia, asal dia parcaya kalo apa yang dia bilang tu nanti jadi.* 24 Tagal itu, dengar Beta bilang par kamong! Apa sa yang kamong minta dari Allah dalang sombayang, kamong musti parcaya sunggu-sunggu kalo kamong su tarima akang. Deng bagitu kamong pasti dapa akang. 25 Kalo kamong sombayang la kamong pung hati ada seng sanang deng orang laeng, kamong musti kasi ampong dia do biar kamong pung Bapa di sorga jua kasi ampong kamong pung dosa-dosa lai. [ 26 Mar, kalo kamong seng kasi ampong orang laeng, kamong pung Bapa di sorga jua seng kasi ampong kamong lai.]”
Orang Yahudi pung pamimping-pamimping tantang Yesus
11:27-33
27 La Yesus deng Antua pung murid-murid bale ka kota Yerusalem kombali. Waktu Antua ada bajalang di orang Yahudi pung Tampa Sombayang Pusat pung kintal bagini, imam-imam kapala, guru-guru Torat, deng orang Yahudi pung pamimping-pamimping datang 28 tanya Antua kata, “Dari mana Ale dapa hak par biking samua tu? Sapa kasi hak par Ale par biking samua-samua tu?”
29 La Antua jawab dong kata, “Beta jua mau tanya kamong lai. Jawab Beta do baru Beta bilang par kamong dari mana Beta dapa hak par biking samua-samua tu. 30 Dari mana Yohanis dapa hak par baptis orang? Dari Allah ka manusia? Coba jawab!”
31 La dong mulai baku bicara soal itu kata, “Kalo katong jawab, ‘Dari Allah’, Dia nanti bilang, ‘Kalo bagitu, mangapa kamong seng parcaya Yohanis?’ 32 Mar katong jua seng bisa bilang, ‘Dari manusia.’ ” Dong bilang bagitu tagal dong taku orang banya. Barang, orang banya anggap Yohanis tu batul-batul Allah pung juru bicara. 33 Jadi dong jawab Yesus kata, “Katong seng tau.”
La Yesus bilang par dong kata, “Kalo bagitu, Beta jua seng mau bilang dari mana Beta dapa hak par biking samua tu.”