Ande-ande soal orang bakabong satu deng biji-biji yang dia ambor
4:1-20
4
1 Satu kali bagini, Yesus kasi balajar orang di pinggir dano Galilea kombali. Orang kawang-kawang datang koliling Antua par dengar Antua pung ajarang. Tagal itu, Antua nai ka parau satu yang ada balabu di situ la dudu di akang, mar orang banya tu tetap ada di pinggir dano.* 2 Tarus, Antua kasi balajar banya hal par dong deng ande-ande. Antua bilang, 3 “Basudara e, dengar Beta mau carita satu! Satu kali bagini, ada orang bakabong satu pi ambor biji-biji di dia pung kabong. 4 Waktu dia ambor biji-biji tu, ada yang jatu di jalang la burung-burung datang tetu akang sampe abis. 5 Ada biji-biji jua yang jatu di tana yang babatu yang akang pung tana sadiki sa. La tagal tana tipis, biji-biji tu akang batumbu capat. 6 Mar waktu matahari nai, akang layu la karing tagal akang pung akar seng maso dalang tana bae-bae. 7 La ada biji-biji lai yang jatu di rumpu baduri la batumbu. Mar rumpu baduri tu garser la gepe akang sampe akang seng bisa babua. 8 Mar ada biji-biji lai yang jatu di tana yang bagus. Akang batumbu la babua. Akang pung hasil ada yang tiga pulu kali, anam pulu kali, deng saratus kali labe banya dari yang dia ambor.”9 Abis carita ande-ande tu, Antua bilang par dong kata, “Sapa ada pung talingang, dengar apa yang Beta bilang tu bae-bae!”
10 Waktu Antua su sandiri deng Antua pung murid sapulu dua deng orang-orang yang iko-iko Antua tu, dong tanya Antua soal ande-ande tu pung arti. 11 La Antua jawab dong kata, “Allah su kasi ijin kamong par tau rahasia soal bagemana Antua pegang parenta jadi Raja. Mar par orang-orang luar, dong dengar akang deng ande-ande sa. 12 Beta biking bagitu biar apa yang su tatulis dalang Allah pung Tulisang tu jadi. Akang bilang kata,
‘Biar kata dong lia bae-bae lai,
mar dong seng tau akang pung arti.
Biar kata dong pasang talingang bae-bae lai,
mar dong seng mangarti jua.
Samua tu jadi macang bagitu biar dong jang bale cari Allah la dapa kasi ampong.’ ”a
13 Tarus, Yesus bilang par dong kata, “Kalo kamong seng mangarti ande-ande yang Beta bilang tu, kamong bisa mangarti ande-ande yang laeng lai bagemana? 14 Ande-ande tu akang pung arti bagini: Orang bakabong yang ambor biji-biji tu orang yang kasi tau Allah pung ajarang. 15 La biji yang jatu di jalang tu orang yang dengar Allah pung ajarang la Setang pung Raja langsung datang la ambe akang dari dia pung hati.
16 Biji yang jatu di tana yang babatu tu orang yang dengar Allah pung ajarang tu la langsung tarima akang deng hati sanang paskali. 17 Mar dia seng kuat, macang deng tanamang yang pung akar seng maso dalang tana bae-bae, jadi dia seng batahang lama. Waktu dia susa deng sangsara tagal ajarang tu, dia langsung bale balakang dari Allah.
18 Biji yang jatu di rumpu baduri tu orang yang dengar Allah pung ajarang tu, 19 mar abis itu dia tinggal kong pikirang deng dia pung hidop hari-hari, gila harta, deng inging saribu satu macang hal yang laeng lai. Samua tu biking sampe dia seng pusing lai deng ajarang tu, la ajarang tu seng bawa hasil apapa dalang dia pung hidop.
20 La biji yang jatu di tana yang bagus la batumbu tu orang yang dengar Allah pung ajarang tu la tarima akang la hidop iko Antua pung mau. Dia pung hidop tu sama deng pohong yang babua banya, ada yang tiga pulu kali, anam pulu kali, deng saratus kali labe banya dari biji-biji yang dapa ambor.”
Taru kira Allah pung kata-kata biar kamong mangarti akang
4:21-25
21 Abis itu, Yesus bale bilang par dong tu lai kata, “Kalo orang bakar palita, dong pasti seng tutu akang deng sempe ka taru akang di bawa koi to? Dong pasti taru akang di tampa yang tinggi biar akang bisa kasi tarang dalang ruma.* 22 Bagitu jua, seng ada apapa satu yang tasambunyi yang nanti seng bisa dapa tau, deng seng ada apapa satu yang tatutu mati yang nanti seng bisa dapa kasi tau par orang banya.* 23 Sapa ada pung talingang, dengar apa yang Beta bilang tu bae-bae!”
24 La Yesus bilang par dong lai kata, “Taru kira apa yang kamong dengar bae-bae! Kalo kamong dengar apa yang Beta bilang, Allah nanti biking kamong mangarti akang, mala labe lai.*b 25 Barang, sapa sa yang mau mangarti apa yang Beta bilang, Allah nanti biking dia labe tamba mangarti lai. Mar sapa yang seng mau mangarti akang, biar kata dia cuma tau sadiki sa, Antua nanti ambe akang dari dia.”*
Allah biking Antua pung orang-orang tamba banya sama deng biji yang batumbu la tamba basar
4:26-29
26 Yesus bilang lai, “Allah pegang parenta jadi Raja tu, akang macang deng apa yang jadi waktu orang ambor biji-biji di dia pung kabong. 27 Sabang malang dia tidor, sabang pagi dia bangong. Waktu itu, dia pung biji-biji tu akang batumbu la jadi basar. Dia sandiri seng tau biji-biji tu batumbu deng cara bagemana. 28 Tana yang biking sampe tanamang tu batumbu sampe kasi kaluar bua. Partama paskali biji-biji tu mulai batunas, abis itu akang mulai batangke, babunga, sampe baisi. 29 Pas akang pung bua su tua, tuang kabong tu langsung datang la ambe akang pung hasil. Barang, itu tu waktu par ambe hasil.”
Allah pung orang-orang nanti tamba kuat sama deng biji kacil yang batumbu jadi pohong basar
4:30-34
30 Tarus, Yesus bale bilang lai kata, “Beta mau pake conto apa biar kamong bisa mangarti kira-kira waktu Allah pegang parenta jadi Raja tu akang macang apa e? Beta musti pake ande-ande apa par kasi jelas akang par kamong e? 31 Akang macang deng biji yang kacil paskali yang orang tanang di kabong. Biji tu, biji yang paleng kacil di dunya ni. 32 Mar kalo akang su batumbu, akang labe basar dari sagala macang sayor yang laeng. Akang pung jaga-jaga basar-basar sampe burung-burung bisa datang biking sarang deng batado di situ.”
33 Antua kasi balajar Allah pung ajarang par dong deng ande-ande banya macang bagitu iko dong pung kuat par mangarti. 34 Antua seng parna kasi balajar dong kalo seng pake ande-ande. Mar waktu Antua ada sandiri deng Antua pung murid-murid, Antua kasi tau samua tu pung arti par dong.
Yesus kasi tado anging ribut basar
4:35-41
35 Akang pung sore, Yesus bilang par Antua pung murid-murid kata, “Mari katong balayar ka sabala dano.”
36 Tarus, Antua pung murid-murid pi dari orang banya tu la nai satu parau deng Yesus la balayar ka sabala. Waktu itu ada parau-parau laeng lai yang balayar sama-sama deng dong. 37 Waktu dong ada balayar, skrek bagini anging ribut basar datang la galombang pukul badang parau sampe aer maso amper pono parau tu.
38 Waktu itu, Yesus ada tidor di parau pung balakang deng kapala di atas bantal. La Antua pung murid-murid kasi bangong Antua kata, “Tuang Guru e! Tuang Guru seng pusing deng katong ka? Katong su amper tinggalang!”
39 Tarus Antua bangong la hokmat anging deng galombang tu kata, “Tado!” Langsung anging deng galombang barenti sampe dano tu licing macang deng minya. 40 La Antua bilang par Antua pung murid-murid kata, “Mangapa kong kamong taku? Mangapa kamong masi seng parcaya Beta?”
41 Antua pung murid-murid paleng takotang la laeng bilang par laeng kata, “Antua ni sapa, sampe anging deng galombang jua iko Antua pung parenta?”