Tungkol yatin Biblia
Anti kananyatin libdo ye peteg a Habi nin Dioh. Ha hatew, impahulat nan Apo Dioh ye monikala na kanlan tatao. Ket naihulat ya ha habin Griego ket haanin, naihulat yayna met ha habin Ayta Abellen. Yatin Bayon Tipan ket maalaga ya boy anhumbongen nin kaganaan a tatao a ampamteg kanan Apo Jesu Cristo. Yati ye ampangibatan nin kaptegan tungkol kanan Apo Dioh boy pamteg tawo kana, pagbi-ay tawo, boy kaligtahan tawo. Legan ambahaen yo boy ampag-adalan ye Habi nin Dioh, mag-aliket kawo dayi, pagbi-ayan yo, boy humaley kanan Apo Dioh.
Main luwampo boy piton libdo ye Bayon Tipan. Hilatin lilibdo, ket impahulat nan Apo Dioh ha nakahinadi a tatao ha loob nin limampo a taon.
Hilay unan apat a libdo a hiyay Mateo, Marcos, Lucas, boy Juan, ket anhabtan “Ebanghelio” o Manged a Balita. Nahabtan hilan wanabay, ta hiyay anti kanlan hilatin lilibdo ket hiyay Manged a Balita tungkol ha panlumateng nan Apo Jesus ihti ha babe-luta boy no way-omen ya nagbi-ay, hiyay aadal na, hiyay kapagtakaan a didinyag na, hiyay pagkamatey boy pagkabi-ay nan uman.
Hiyay ikaliman libdo ket anhabtan Didiyag, ta anti kananyatin libdo ye Didiyag lan aapohtol nan Apo Jesus ha nag-udong yayna ha langit. Anti kananyatin libdo ye tungkol ha pangipatanda la nin Manged a Balita tungkol kanan Apo Jesus ha malabong a babadiyo boy babanwa. Ket malabong ye namteg kanan Apo Jesus. Anti met ye tungkol ha pagkaitayak nin Habi nin Dioh ibat ha Jerusalem angga ha kaganaan a lulugal a anhakopen nin Roma.
Main luwampo boy maghay huhulat a impahulat nan Apo Dioh kanlan nangaanon tatao. Ket impawit la hilati ha kanayon a tatao o papangkat nin māmteg ta-omen pumaghen ye pamteg la boy ta-omen la matandaan no way-omen magbi-ay no magdiha hilan papanubok o kaidapan boy ta-omen la matandaan ye huhton adal boy hiyay matoynong a pagbi-ay a hukat lan tuwaden.
Hiyay kalampohan a libdo ket anhabtan Impakit. Kananyatin libdo, impakit nan Apo Jesus kanan apohtol Juan ye malyadi lano ha kalampuhan nin babe-luta.
Hilay nangihulat nin yati ha habin Ayta Abellen, ampahalamat hila kanan Apo Dioh, ta hiyabay ye nanaglap kanla boy namyay kanla nin kalighaan, kakhawan, boy kaaliketan legan an-ihulat lay Bayon Tipan ha habin Ayta Abellen. An-ipakigwang la a bayowen na hilan Apo Dioh ye kaganaan a mamaha o manlenge ha Habi na (Roma 12:2; 2 Corinto 5:17).